Aizawl: Food, Civil Supplies & Consumer Affairs (FCS&CA) Minister B. Lalchhanzova sawmna angin Nilaini khan India hmarchhaka Indian Oil hotupa ber, Nitin Bhatnagar (Executive Director, IO-AOD) chuan a pisaah a hmu a, Mizorama oil depot bun tura hmalakna kal mek an sawi dun.
Minister chuan khuarel chhiatna leh thenawm state-a buainate avanga tuialhthei lakluh a harsat thin avangin Mizoramin a dahkhawlna lian tham, oil depot a mamawh tak zet thu a sawi a. State sorkarin depot siamna tur hmun a enfiah tawh bawk avangin a theih dan apiang um zuiin ram pawh a thlawna pek a inpeih reng thu Bhatnagar-a hi a hrilh a ni.
Prime minister-in Mizoram a tlawh hunah pawh he thil hi thualnawn a tum thu a sawi bawk.
Bhatnagar-a pawhin Mizoramah oil depot din ngei an duh thu sawiin, chief minister leh supply minister-te thahnemngaihna chuan rah tha a chhuah ngei a beisei thu a sawi a. Company leh Ministry of Petroleum & Natural Gas hnenah pawh an theih angin hma an lak chhunzawm mek thu a sawi.
An inkawmnaah hian FCS&CA Addl. Secretary Dr. Andrew H. Vanlaldika leh IOCL Deputy Manager Z. Lungdim-te an tel bawk.