Aizawl: Assembly Deputy Speaker leh Kolasib bialtu MLA Lalfamkima chuan Zero Point atanga Bairabi panna kawng thawm that mek dinhmun chu Ningani khan a enfiah.
Lalfamkima chuan he kawngpui hi mipuite tana pawimawh leh tangkai tak a nih thu leh a chhiat em avanga a vei ber thin a nih thu sawiin, inenkawl a ngaih avanga a tlawh har deuh hnuah a hun neih hmasa berah a tlawh nghal tih a sawi a. A siamnaa theihtawp chhuahtu PWD-te chungah lawmthu sawiin, harsatna lo tuar tawhtu khaw mipuite hriatthiamna a dil a ni.
Tunah fur ruah sur a nasat rih avangin contractor-ten duh angin hna an thawk thei rih lo va, mipuite tlan tlang theih nan single lane chin tal thawm tha a, a khuar zual laite lunga hnawh khat turin a chah a. Ruahsur chhung hian balu phur lirtheite tlan dangchat tawp lo va, company-in lirthei body capacity a pek aia tam phur lo turin a ngen bawk.
Executive Engineer, PWD (NH) Division-III report an pek danin, he kawng siam hna atan hian sorkarin Rs nuai 2,752.82 a ruahman (sanction) a; a chhang hniam ber Tanor Engineering hnenah Rs vbc 15.94 pein June 30, 2025 khan hna an tan a, thla 11 chhunga zo tura contract ziah a ni.
Amaherawhchu contractor-te hnathawh a chhiat a, hun tiam chhunga an zawh tak loh avangin Mizoram sorkar chuan Monsoon Damage Repair Fund atangin Rs 34,01,800 a ruahman belh leh a, he sum hmang hian kawng siamna tura lung lakkhawm leh supply hna thawh mek a ni.