Athens bula Greek thliarkarah ‘a rual deuhthawin’ hmun hnihah kangmei a chhuak a, mi pahnih thiin mi za tam tak hmun himah an insawn chhuak tih thuneituten an sawi.
Kang thelhtu 200 chuangin Pathianni thlenga la hlauhawm tak, Salamina thliarkara kang nen a inman kai loh nan an thelh nghal mek.
Kang hmasa zawk hi Pathianni chawhnu dar 2:40 (India-a tlai dar 5:10)-ah thliarkar chhim lam vaukamah chhuakin thli chak tak avangin a darh chak hle a, a hnu minute 20 velah khawchhak lamah a dang a chhuak zui a ni.
Greek chanchinbute chuan lawng hmangin mi 500 chuang an insaseng nghal niin an tar lang a. A kan chhan erawh hriat a la ni lo.
Patrol boat panga tirh nghal niin mi mal lawngte pawh pui turin ruahman a ni a. Thlawhna leh fire engine 50 tirh nghal an ni bawk.
A kang hmasa zawk hi chhim lama Peristeria khawpui huam chhunga mihring chenna leh ram ngaw inpawlh laiah a ni tih fire thuneitu, Vasilios Vathrakoyannis-a chuan a sawi a. A hnu lawkah khawchhak lama Selinia khuaah a chhuak zui tih a sawi.
Kang thelhtute hian a kang tan hmasak zawkna hmunah hian ruang pahnih an chhar tih a sawi bawk.
Mi 10 vel kang hliam leh ‘meikhu hip lut nasa avanga harsatna nei’ an awm a, panga chu tual chhung damdawi inah enkawl an ni tih Greek Health Minister Adonis Georgiades chuan X-ah a tar lang.
Salamina Deputy Mayor Thodoris Zannis-a chuan kangthelhtuten thliarkara tlanga ram kang nasa tak thelh hna an thawk mek a, kang chhuak thar nena an inzawm chuan nasa lehzual a ni dawn tih a sawi.
A thelhnaah hian tui phur leh in sakna hmanruate pawh hman a ni.
Salamina hi Athens khawthlang dai maia awm niin mi 37,000 vel an cheng a, a tam zawk hi tar an ni.
Kar tawp liam taah khan Europe hmun hrang hrangah kang thelhtute chu ram kang thelhin an buai he a. Belgium-ah chuan an ramngaw humhalh that lai, Hautes Fagnes-a kang chu thelh tumin ni thum an bei tawh.
He ram nag hi tun hnaia an rama a nasa ber niin an sawi a, darkar 24 lek chhungin a leta zau a kang hman niin ansawi.
Zirtawpni zan khan Croatia vaukam hrula ram kangah mi pakhat thiin eng emaw zatin hliam an tuar bawk.
Croatia-a fire chief Slavko Tucakovic-a chuan an ram chanchina ‘a nasa ber pakhat’ a nih thu leh mi cheng leh khualzin 1,200 vel insaseng ngai an awm thu a sawi.