Aizawl: Mizoram chu sa, artui leh bawnghnutea a intodelh loh em em avangin sorkarin intodelhna turin chak takin hma a la mek tih Animal Husbandry & Veterinary Minister C. Lalsawivunga chuan Thawhtannia ZPM Party Office-a chhung inkhawm neihah a sawi.
C Lalsawivunga chuan Meka Egg Production Firm hmangin Thenzawlah Rs. vbc 20.63 sengin artui ni tina 70,000 atanga 75,000 tharchhuahna tur hmun ruahman mek a nih bakah kumin February atang khan state history-a a vawi khatna atan animal insurance kalpui a nih thu leh August 11, 2026 thleng khan ran 4,724 puihna sum Rs. nuai 41.10 pek a nih tawh thu a sawi.
Minister chuan ran chaw siamna tur atan hand holding hnuaiah Champhai leh Khawzawl district-a khaw 11-ah vaimim leh bekang chin pawlh (contract farming) kalpui mek a nih thu leh Thenzawl, Hnahlan leh Hortoki-ah ran chaw chinna leh siamna hmun tur ruahmanna a thlen tawh thu a sawi bawk.
ZPM sorkar kalphung thar leh hmasawnna sawiin, Chief Minister Lalduhoma kaihhruai ministry-in kum khat tlin hmain flagship programme a takin a kalpui nghal hman tih a sawi a; sawhthing, aieng leh hmarcha eizawnna atana thlante chu man man taka hralh a nih zel bakah MS Goodfaith nen tangkawpin May 19, 2026 khan Slice Dry Ginger metric ton 5.4 a vawi khat nan hralh a ni a, DoNER ministry atanga Rs. vbc 30.13 dawngin Champhai district-ah sawhthing sawngbawlna hub siam tura hma lak a nih thu a sawi.
ZPM chu dawt leng ve lo leh thu dik hmanga politics khel party a ni a, hetiang zela kal a nih chuan ram mipuiten kum 2028-ah sorkarna an pe leh ngei dawn a ni tiin, thu dik taka politics khel zel turin a chah a ni.