Speaker Lalbiakzama kaihhruaina hnuaia Business Advisory Committee (BAC) thukhawm chuan Larsap Gen. VK Singh-a’n August 25 atanga tan tura assembly fur thutkhawm a koh chu ni hnih thu turin an ruahman a, he thutkhawmah hian Mizoram State hla (official song) atana ‘Ro Min Relsak Ang Che’ tih nemngheh a tum a ni.
BAC ruahmanna siam danin, August 25-ah inkhawm tan a ni ang a, mi sun tur a awm chuan sunna hun hman a nih bakah zawhna leh chhanna hun hman a ni ang a, sorkar atanga tihtur lut hrang hrangte kalpui a ni bawk ang.
August 26 hi chawlh niin a tuk, August 27-ah thutkhawm hi chhunzawm lehin, pawtsei tura chhan dang a awm lem lo a nih chuan tiamchin awm lova tihtawp zui a ni dawn a ni.
Sorkar bill lut zat tur chiang taka hriat a la nih loh rualin, Irrigation & Water Resources Department leh Home Department atangin dan siam tur pahnih a lut tawh a, tun dinhmunah House chhunga chhan chi zawhna (starred question) 303 leh ziaka chhan chi (unstarred question) 64 bakah House dawhkana dah tur lehkha pawimawh panga a lut tawh a ni.