Aizawl: Health & Family Welfare Minister Lalrinpuii chuan Thawhtanni khan Urban Infrastructure Development Fund (UIDF) sum Rs nuai 200 senga Lunglei Park, Chanmari, Lunglei chei that hna thawh tur lungphum a phum a, Lunglei chei that leh mawia siam chu a tir atanga a vei thu sawiin, ‘Unique Lunglei’ tih hming chawiin mawi danglam bik taka khawpui chei turin hma lak mek a ni tih a sawi.
UD&PA Office-a lungphum phum puala inkhawm tawi buatsaihah minister chuan Lunglei Park chu khawpui timawitu leh vantlang len khawthawnna hmuna siam a nih theih nan LMC leh UD&PA department nen kawng dap a nih hnuah, sorkarin UIDF atanga sum a ruahmansak chu lawmawm a tih thu a sawi a, hnathawktute chu tha taka thawk tura chahin mipuite leh tlawmngai pawlte pawh theihtawp chhuah tlang turin a sawm bawk.
PRASHAD Scheme atanga Tarmita Khawthlirah Rs vbc 3 chuang hmanga skywalk siam tum a nih thu leh UIDF hnuaiah mahni inchawm thei a nih theih nan Pay & Use Toilet pawh sak tum a nih thu a sawi a. Chanmari veng chu Lunglei laili a nih angin Chanmari Beautification Committee hmanga chei tum niin thlanmual leh kawngpui siam that bakah inelna hrang hrang buatsaih tum a nih thu sawiin, MLA bial leh veng hrang hrangah khawpui faina leh chei mawina kawngah mipuite thawhpuina a ngen bawk.