Chief Minister Lalduhoma chuan Thawhtanni khan Treasury Square-ah Mizo Hmeichhe Insuihkhawm Pawl (MHIP) General Headquarters building thar sakna tur lungphum a phum a, he hunah hian MHIP chu hmeichhia leh naupangte tana pawl bik awmchhun leh sorkar bultuma din a nih avangin tuamhlawm zui zel chu sorkar tih tur âwm tak a nih thu a sawi.
Lungphum inkhawmah chief minister chuan MHIP-ten building thar leh changkang tak an nei mai tur chu a lawmpui thu sawiin, nunau thlamuanna leh Mizo Marriage, Divorce & Inheritance of Property Act, 2014 pass a nih theih nana an hmalakna te, kum 2016-a Nari Shakti Puruskar lawmman an lo lak tawhnate chu an hna thawh tha tak chhinchhiahna a nih thu a sawi a. MHIP leh tlawmngai pawl dangte chu Mizo society thui phuitu leh social institution pawimawh tak an nih avangin hmunhma tha leh zahawm tawk tak neihtir chu sorkar thil tum a ni tih a sawi bawk.
Chief minister chuan YMA tana Thingsulthliah-a Convention Centre sak mek te, MUP office zauhsak te, MSU office hmun tur Ainawn Veng-a ruahmansak leh hmun pasariha Working Women Hostel sak mek a nih thu a sawi tel.
Hmasawnna hna chak zawka a kal theih nan Financial Advisory System hmangin finance department thuneihna tam tak department secretary-te kuta dah a nih thu leh SASCI sum ruahmante hman tangkaipui zel tur chuan thawhhona tha a pawimawh thu a sawi rualin, building sak tur chu a tir atanga a tawp thlenga uluk taka vil zui turin MHIP hotute a chah bawk.
He hunah hian MHIP President Lalliani pawhin thu sawiin an building hlui chu luah reng tlak a nih tak loh avanga a thar sakna tur an buaipui chungchang sawiin, kawng tinrenga puitu Chief Minister Lalduhoma, WCD Minister Lalrinpuii leh sorkar official-te chungah lawmthu a sawi a.
MHIP General Headquarters building hlui hi April 20, 1993 atanga luah tan niin a thar hi a hmun ngaiah SASCI 2025-26 sum Rs nuaih 370 senga sak tura ruahman a ni.