Aizawl: Mizo National Front (MNF) Party chuan Thawhlehni khan Cultural Centre cum Auditorium, Vaivakawnah Party President Zoramthanga kaihhruainain National Executive Meeting an nei a, chief minister Lalduhoma thusawi chungchang bawhzuina thuah a tul ang zelin MNF Headquarters in hma lo la zel sela tha an ti.
MNF chuan tun hnaia Chief Minister Lalduhoma’n Mizoram Peace Accord leh Bengal Eastern Frontier Regulation 1873 hnuaia Inner Line Permit (ILP) chungchanga dik lo tak leh zam aw taka a thusawite chu Mizo hnam tana thil pawi tak a ni tiin tha lo an ti a. Chief minister-in August 15, 2026 hmaa he a thusawi a sut leh ngei nan leh Zoram mipuite hmaa ngaihdam a dil a phutna a tihlawhtling lo chu pawi tiin, he thil bawhzuina zelah a tul ang zelin MNF Headquarters in hma lo la chhunzawm zel rawh se tiin resolution an pass a ni.
MNF sorkar laia sikul tam tak upgrade tura hma lo lak leh lo chhawp tawhte chu tun ZPM sorkarin an dinhmun thalo leh chhe zawnga a kalpui ta mai hi thalo an ti a. MNF-in sorkarna an chan leh veleh an lo upgrade tawh ang thlapa awm chhunzawm ngei an tum tlat thu an pass bawk.
Aizawl khawpui leh Zoram hmun hrang hrangah mipuite kaiharh turin MNF Headquarters-in campaign programme duang turin an ti bawk.