Mizo Zaimi Inzawmkhawm (MZI) General Headquarters chuan Thawhlehni khan Aizawl Press Club-ah thuthar thehdarhtute kawmin, kumin hian a vawi hnihna atana 2nd Inter High School & Higher Secondary School Beat Contest buatsaih an tum tih an sawi.
MZI hruaitute chuan chuan kum 1980-a din tawh, tunah kum 46-na hmang mek an nih dante leh Mizoram piah lamah USA leh Goa thlenga branch nei a, music hmanga Mizo hnam leh culture humhalh hna an thawh thin dante a sawi fiah hmasa a ni.
Nikum August-a an lo buatsaih tawh, zirlaiten an hlut em em Inter HS & HSS Beat Contest chu School Education Director remtihna anga chhunzawm lehin, September 9-10, 2026 chhung hian Vana Pa Hall, Aizawlah neih leh a nih tur thu an sawi.
Kumin inelnaah hian zirlaite hun khawhral lutuk loh nan in lamah music video demo kaltlangin Top 10 thlan chhuah hmasak a ni dawn a, heng Top 10-te hian Vana Pa Hall-ah intihsiakna tak tak an hmachhawn tawh dawn a ni. Tel tur tan General Secretary Isaac Hmar (8794592167) leh Assistant General Secretary Abraham M Ralte (9774954386) te hnenah video theh luh tur a ni.
Lawmman pawh nikum aiin tihpun niin, pakhatnain Rs 70,000, pahnihnain Rs 50,000, pathumnain Rs 30,000 leh Top 7 dangten Rs 10,000 theuh an dawng dawn a, mi mal lawmman pawh an siam a, discipline tin a titha berin Rs 1000 leh citation an dawng dawn a ni.