Aizawl: Serchhip district-in kawngpui tha leh tlo an neih theihna tura theihtawp chhuah zel a nih thu leh a tul dan azira dan anga hma la thei turin Legal Team din a nih thu Serchhip District Bawrhsap Paul L. Khuma chuan a sawi.
Thawhlehni khan DC Meeting Room-ah thu thar thehdarhtute kawmin National Highway 02 siamtu contractor KRAM Infracon Pvt. Ltd. chungah chauh lo pawh, anmahni ruaitu NHIDCL lakah pawh a tul chuan legal action lak a nih tur thu a sawi.
Bawrhsap chuan NH-02 Package 2 siamtu KRAM Infracon Pvt. Ltd. hnathawh tha lo leh an enkawltu, NHIDCL engineer-te enkawlna hnuaia lung tha lo an hmang chu thinrimthlak a tih thu a sawi a. DC Inspection Team leh MJA-ten lung chu truck trip nga zet an paihtir a. Hnathawktute lakah leh anmahni ruaitute lakah pawh hian a tul chuan court kal a ngai dawn nia sawiin legal team din a nih tak thu a sawi.
Tun hnaia NH-02 thawm that mek hi lirthei tlan lailawk theih nana a siam rih a ni a, September thla ruah a hul hunah hai chhuah leh vek tur niin metal road pangngai anga siam thar leh vek tur a ni dawn a ni.
Bawrhsap chuan district-in kawngpui tha leh tlo an neih ngei nan thawktu contractor-te chu an DLP neih chhung hian theihtawp chhuaha an vil zui zel tur thu sawiin, media-te leh NGO-te an tawiawm a lawmthu a sawi a. District mipuite leh tlawmngai pawhte pawh vantlang thil leh hmasawnna hnathawhte neitu nihna pu chunga, thahnemngai taka lo vil leh enkawl zui turin a chah thar bawk.