Aizawl: Mizoram sorkar hnuaia dan lova family pension leh pension la mekten anmahni duhthlanna ngeia an tihtawp (surrender) theih nan September, 2026 thleng hun pek an nih avangin, he hun tiam chhung hian mahni duhthu ngeia in-surrender vat tura ngen an ni.
Thawhlehni khan Aizawl North leh South Treasury buatsaihin BNRGSK Hall, Aibawkah dan lova pension la tihreh dan tur leh inzirtirna hun ‘Sensitisation Programme’ buatsaih a ni a. He hun hi Aizawl South Treasury Officer Allen VL Pundir-a’n a kaihruai a, Aibawk BDO VL Chaka Hmar, Aibawk BDO hnuaia VC-te, YMA leh Kohhran Bial hruaitute, pensioner-te, DDO-te leh Registrar of Births & Deaths aiawhte an tel.
He huna Resource Person Lalthanpuii (AA&O) chuan Mizoram sorkar hnuaia dan ang taka family pension la thei tawh lo leh document dik lo hmanga la zui mek eng emaw zat an awm tih sawiin, hriat sual avang emaw dan hre lo avanga la mekten Treasury Office-ah PPO pe kirin Form hmanga in-surrender tura ngen an nih thu a sawi.
Kumin September thleng hian mahni duhthu ngeia in-surrender te chu sorkarin pawisa pawh rulhtir lovin a ngaidam hmak dawn a ni. Amaherawhchu, September, 2026 hnu lamah chuan ngaihdamna a awm tawh lovang a, Task Force hmanga endik hna thawhin court lamah Bharatiya Nyaya Sanhita (BNS) leh BNSS hnuaiah thubuai rip tak siamsak an ni dawn a, pawisa chawi leh jail tan thlengin hremna lekkawh a ni tawh dawn a ni.
Hemi kawngah hian document dik lo pe chhuaktu leh hriatpuina lehkha dik lo hmangte pawh dan hnuaiah hmalak an nih dawn avangin, Treasury hotute chuan VC, Kohhran leh YMA-te hnenah an mi leh sate dinhmun dik tak chauh hriatpui turin an ngen a ni.
Kalkhawmte pawhin sorkar thawhpuiin he chanchin hi a zau thei ang bera puanzar an tum thu an sawi bawk.
Sensitisation programme hi district leh block hrang hrangah Treasury Office te hian an kalpui mek a, Aibawk-a hun hman hi Aizawl North Treasury Officer Dr. Lalzahawma’n lawmthu sawiin a khar a ni.