- Laiu Fachhai
“THE FOREIGN CONTRIBUTION (REGULATION) AMENDMENT BILL, 2026” chu a full text ka chhiar chhuak ve hram ta a. Chipchiar lutuk lo deuhin, technical lam pawh sawi tam lovin, sawi hlawh berte ka hmuh dan tlema ka han tuihnih ve ang e. Ka chhiar sual emaw, ka hrilhfiah dik lo emaw a awm thei. A thu inzawmna atana mi tam takin hriat tawh sa sawi nawn lehna pawh a awm nual ang a, chhiartute hriatthiamna ka ngen e.
FCRA-a in-register hi thil har tak a ni a. Congress sawrkar laiah pawh khan in-register duh, nimahsela registration phal loh pawl an awm nual a ni. Tunah phei chu a har leh zual a ni awm e. Global village-ah kan awm mek a, khawvel mihringte inzawmna pawh a awlsam tul tul a. India atanga foreign lam sum thawn duh leh foreign atanga India lam sum thawn duhte pawh an pung zel a ni. Mimal sumah chuan, bituk zat aia tam loh foreign sum hmuh chu danin a phal a. Sakhua pawl, school, hospital, orphanage, NGO leh pawl dangte erawh chu foreign atanga sum an hmuh duh chuan FCRA registration neih a ngai a ni. Chuvangin, FCRA registration neih chu foreign atanga tanpuina dawng thin sakhua pawl leh pawl dangte atan chuan thil hlu tak a ni.
Pawl te chuan foreign atanga sum an lakluh theih dan kawng pahnih an nei. A pakhatna chu sum lo luhna (source) leh a hmanna tur duan sa chi a ni a. Hei hi chu FCRA registration neih kher loh pawhin vawikhat atan Central sawrkarah dil chi a ni a, dil zel theih a ni. A pahnihna chu source hriat hmasa ngai loh leh a hmanna tur duan hmasa ngai loh chi, FCRA tih hi a ni a. Sum hmuh hunah erawh chuan a source, sum hmuh zat leh a hmanna kimchang chu Chartered Accountant audit report hmangin sawrkarah thehluh thin tur a ni.
FCRA kal tlanga foreign sum hman phal lohna pawh sawrkarin chiang takin a tarlang a. Tiang hian FCRA sum hman phal lohna chu a tlangkawm theih awm e: Politics tihna (political activities), sakhua inlettir luihna (forced conversion), hnam leh hnam inrem loh tirna (communal discord), punna beiseia sum dahna (speculative investment), mi dangte leh pawl dangte tan foreign sum lakluhsakna (fund transfers), leh administration senso atan 20% aia tam hman (excess administrative work) te hi an tel. Politics tihna atan hman phal lohnaah hian, sawrkar laka helna leh hel pawl te atana foreign sum lakluh pawh a huam ve. He khapna dan hi chu pawm theih lohna tur awmin a lang lo.
Chutih laiin, kumina FCRA Amendment Bill 2026 chungchanga sawi hlawh ber leh pawm harsa bera lang chu, pawl pakhatin FCRA Registration a neih tawh loh chuan, FCRA sum hmanga an ram lei, in sak leh property dangte chu Designated Authority (Thuneihna Pek Thuneihtu) enkawlnaah a awm ang a, Designated Authority chuan a awm bera a ngaih Central/State sawrkar department-ah emaw, local authority kutah emaw a hlan ang a, anni chuan mipui (public) tan an hmang dawn a ni tih hi a ni. Tin, FCRA sum hman bang a awm chuan Consolidated Fund-ah dah a ni ang a, mipui tan hman a ni ang tih pawh hi sawi a hlawh ve hle.
FCRA registration hi kawng thumin a tawp thei a. Pakhatna chu, FCRA sum hman phal lohna atana hman emaw, sum hman danah dik lohna hmuh a nih avang emaw, sawrkarin a titawp a ni. Pahnihna chu, registration tithar (renew) loh avangin automatic-a tawp a ni. Pathumna chu, FCRA neih chhunzawm an duh tawh loh avangin, mahni duhthlanna-in an registration chu an surrender a ni. FCRA Amendment Bill 2026 anga kal tur a nih chuan, FCRA suma lei leh sak property-te neih reng theihna tur chuan FCRA registration nei reng a ngai dawn tihna a ni a. Chutih laia khir em em chu hei hi a ni: FCRA registration tinung reng tur chuan, kum hnih chhungin cheng nuai sawm (Rs 10 lakhs) hmuh reng a ngai dawn a ni. Chutiang zat an hmuh loh chuan an registration chu titawp thei a ni. Kum hnih dana regular taka cheng nuai sawm hmuh reng chu pawl thenkhat tan chuan a har hle ang.
He dan famkim lohna pakhat chu, FCRA titawp theihna chhan leh vang pakhatnaah hian, registration titawp sak pawlten appeal theihna clause a awm loh hi a ni, ka chhiar danah chuan. Chuan, a hun taka renew hman lohte tan pawh renew that lehna procedure-te hi a khir hle awm e. Chuvangin dan hman sualna tur kawng zau takin a inhawng tlat a ni. Eng emaw chhuanlam siamin, tu pawl emaw chu FCRA sum hman sual anga puh theihna an zawng kual ang a, an FCRA titawp a nih hnuah chuan an property-te chu lak sak theih an nih dawn ta a ni. Dik lohna nei lohte chungah chuan hetiang thil hi thleng lo hram se!
FCRA titawp hnua FCRA sum hmanga an neih moveable leh immoveable property-te chu Designated Authority kutah leh Consolidated Fund-ah dah a, mipui tan hman tur a ni ang tih hi, a tum ber chu pawl dintu (founder)-te emaw, pawl enkawltute emaw-in anmahni mimal property atan an inlak lohna leh an insem lohna tura venna ni berin a lang. Chutiang case-te chu khawi hmunah leh eng hunah emaw a lo awm tawh vang pawh a nih mahna. Chutianga case awm theih lakah invenna tura duan a nih chuan, a thatna lai a awm ve a ni.
He dan hnuaia thil laklawh em em nia lang pakhat chu hei hi a ni. Foreign contribution leh a ram chhunga (domestic) contribution te hmang kawpa ram an lei leh in an sakte then hran dan turah hian chiang taka sawifiah a ni lo. FCRA sum eng emaw zat hman vea din school, hospital, orphanage, etc. te chu dissolve ni tawhin an function tawh loh chuan, account-a sum luh leh hmanna enin eng emaw chen chu FCRA sum zat a hriat theih ang. Mahse school, hospital, orphanage, etc. te a ding rih a, mipui tan a function tha hle rih a nih chuan, FCRA registration an neih tawh loh pawhin mipui rawng an la bawl rih tho tihna a ni a. Chutiang chu nih si, eng vangin nge FCRA sum an hmuhte pek kir vek leh kher chu a ngai ang, tih hi zawhna lian tak chu a ni.
Tuna Bill awm danah chuan, FCRA hnuaia foreign sum lo hmuh tawh sakhua pawl, school, hospital, orphanage leh pawl dangte chu an rawngbawlna tha takin kalpui rih hle mahse, an FCRA registration a tawp tawh chuan, FCRA an neih laia foreign sum an lo hmuh tawh zawng zawng chu pek kir leh vek a ngai dawn tihna a ni. FCRA sum pek kirna tur erawh chu donorte hnenah ni lovin, Designated Authority kutah emaw, Consolidated Fund-ah emaw a ni thung. Hei hi a mak hle. Chuvangin, he dan hi mithiamte duan chu a ni ngei ang a; mahse, chhanna aiin zawhna a titam zawk tlat. Ngaihtuahna zau zawk leh fim zawk hmanga ngaihtuah that leh a tul tak zet a ni.
Worship place (biak in) erawh chu he dan hian a huam lo ang tih a nih leh si a. Foreign sum hmanga, biak in sak telin, conversion leh religious activities neiha inpuhna chu a ni lo em ni, thintlang lam sakhua dang mi thenkhatte chuan Kristiante khinna dik loh (false accusation) siam a, an helna thin ber chu? Ni e, FCRA Amendment Bill 2026-ah hian thil tha leh tha lo te an inchawhpawl tlat a ni. He Bill-a worship place (biak in) erawh chu a huam lo ang tih hi exception leh safety clause chu a ni ve hrim hrim a. Chuvangin, he Bill hi a negative vek lo e. He clause atanga thlîr chuan, he dan hi minority sakhuate atana dan khirhkhan siamna lam ni lovin, foreign sum hmanna dik lam a kawk zawkin a lang.
He Bill hi pass ni ta se, Mizorama kohhrante a nghawng tur bik ngaihtuah ta ila. FCRA sum tel ve-a din school, hospital, orphanage leh kohhran program dangte chu, eng emaw avanga an FCRA chu ti tawp a nih pawhin, FCRA sum hmanna tel ve kohhran property leh a program-te chu an la kal zel hlawm tho a rinawm a. Chuvangin property chungchangah chuan Designated Authority-te kutah hlan a nih pawhin, Kristiante majority nihna state-a kohhran leh mipui rilru tinat zawngin dik lo taka thil an tih a rinawm lo. Chuvangin hlauhthawnna tur chu tih te chiama awmin a lang lo, FCRA sum hmanna a dik phawt chuan.
He article ziaktu lawina kohhran, Evangelical Church of Maraland (ECM) leh a rawngbawlna peng hrang hrangte chu foreign puina sum dawng lovin, a tir atanga mahni kut leh ke-a ding kohhran an nih avangin, FCRA Amendment Bill 2026 hian a nghawngna tur a awm ve lo. Chutiang kohhran chu an awm nual a rinawm. Kristiante minority an nihna hmunah erawh chuan, mahni kut leh ke-a ding thei rih loh kohhran, school, hospital, orphanage leh thil dangte an awm nual rih ang a. Chuvangin, foreign atanga puina dawng mek pawh an awm ang. Chumite atan chuan, he dan hian hmang sualna leh Kristiante chan a chhiat tir theihna kawng a siam thei.
Kohhran chuan sawrkar thiltum leh ruahmanna te pawm theih loh a neih a nih chuan, political party leh pressure group te tihdan anga kawngzawh ve hi kohhran tih dan tur leh kal dan tur tha ber a ni ang em tih erawh chu ngaih dan leh pawm dan a inang hlawm lo a ni. Kawngzawh hi thil sual chu a ni hauh lo. Chutih lai chuan, he article ziaktuin kohhran tana tih dan tur leh kal dan tur thaa a ngaih chu hei hi a ni. Sawrkar thiltum, ruahmanna leh thiltih te chu kohhranin tha lo nia a hmuh a, a pawm theih loh a nih chuan, political party leh pressure group te tihdan anga kawng zawh ve mai lovin, kohhran a nihna hre reng chungin puitling taka tawngtaina nen sawrkar hnenah thlen (representation neih) a ni. Kohhran chu a danglam tur a ni.
Ni e, FCRA Amendment Bill 2026 hi sawrkar laipui chuan ram tana thil tha nia a hriat avanga a duan chu a ni ngei ang a. Nimahsela, chhanna aiin zawhna a titam zawk daih a ni. FCRA kal tlanga foreign sum an hmuh hman sualte an awm chuan sawrkarin dan angin action la mai sela. Chutianga ni lo a, sawrkarin dik lohna a hmuh avanga FCRA a titawpsakte chauh ni lovin, a hun taka renew thei lohte leh anmahni duhthlanna avanga FCRA registration surrender tawhte thlengin, an pawl leh institution-te chu an la ding rih a, an rawngbawlna pawh a kal tha reng chungin, FCRA sum hmanga ram lei, in sak leh property dangte lak sak vekna tur dan siam chu thil tha ber niin a lang lo.
Chuvangin, Joint Parliamentary Committee (JPC) chuan ngaihtuahna fim tak hmangin, fimkhur takin he Bill hi zir chiang sela, siamthat ngaite siamthat bawk sela, ram tan tha ber tur Bill chu lo chhuahpui sela a lawmawm ngawt ang. Misualte laka invenna dan siam hian India khua leh tuite atana thil thate hlohna leh channa a thlen palh thei tih hi Parliament leh sawrkar chuan hria se a tha ngawt ang.