Aizawl: Mizoram chief minister hlui, Mizo National Front (MNF) president, Zoramthanga chuan kum 60 kaltaa Bachelor of Arts (BA) exam a pass hnuah Ningani hian Gauhati University-in a degree certificate a hlan dawn.
India Today NE-in a tar lan danin certificate hlanna hi Gauhati University-a Phanidhar Dutta Seminar Hall-ah chawhnu dar 2:30-ah neih a ni dawn a, University Vice-Chancellor Prof. Nani Gopal Mahanta-a’n Zoramthanga hnenah hian a hlan ang.
Zoramthanga hi kum 1966 khan Dhanamanjuri College, Imphal (hetih laia Gauhati University hnuaia awm)-ah English Major lain final year exam a hmachhawn a, second class-ah a pass a ni.
Exam a zawh hnuah Laldenga hruaina hnuaia rambuai tan mekah MNF zawmin underground-ah a luh avangin a degree certificate hi a la chhuak hman ta lo a ni.
He hun pual hian Amia Kumar Das Institute of Social Change and Development, Gauhati University Institute of North East India Studies leh Centre for South East Asian Studies te tangkawpin Zoramthanga hi special lecture ‘From Guerrilla Fighter to a Peace Maker’ tih thupui hmangin an neihpui bawk ang.
Lecture hi Vice-Chancellor Prof. Nani Gopal Mahanta-a’n a hawng ang a, guest of honour atan Amia Kumar Das Institute of Social Change & Development governing body Chairman Subhash Chandra Das a tel bawk ang.
Zoramthanga hi Penguin Books-in kum 2026-a a tihchhuah a autobiography — From Guerrilla Fighter to Chief Minister — ziaktu a ni bawk.