Aizawl: Zoram Entu Pawl (ZEP) buatsaihin a tum hnihna atan ‘World Humanitarian Day’ hman a ni a. Rualbanlote tangkaina leh dikna chanvo humhalh a pawimawh hle tiin an sawi.
Nilainia I&PR Auditorium-a hun hman hi Rev. Bishop Stephen Rotluanga CSC, Bishop of Aizawl leh ZEP President ni bawkin a hawng a. Khuallian, Vanlaldiki Sailo, State Commissioner for Persons’ with Disabilities chuan thu sawiin Mizoram chhunga district 11-ah accessibility audit neih tawh a nih thu a sawi a. Vantlang hmun leh pisa thenkhatah rualbanlote tana awlsamna hmalakna awm tawh mah se zaa 90 erawh chu rualbanlote tan a la awlsam lo hle a ni tih sawiin, rualbanlote venhimna leh an dikna chanvo humhalh tura Rights of PWD Act 2016 pawimawhzia a sawi a, mi tinte fimkhur turin a chah.
PwD Commissioner hian rualbanlote thlavang hauhna thu hi sawiin, “Vantlang hmun reng reng, inthiarna thlengin rualbanlote tan awlsam taka hman theih turin ruahmanna kan siam vek tur a ni,” a ti a. Lengpui Airport lam te pawh endik turin ruahmanna an siam mek thu tih a sawi bawk.
Hemi pual hian pawl hrang hrang — Central YMA, MHIP, SELCO Foundation, ADRA, JRS leh MDPO aiawhte an tel a, tanpui ngaite puihna kawnga an hmalaknate ngaihthlak a ni.
Panel discussion neih chhunzawm niin, Mizoram chhunga tanpui ngai leh harsatna neite mamawh ber te, rikrum thila rualbanlote harsatna tawh thin te leh. sorkar leh humanitarian worker-te tangkawpa rualbanlote tan hmalak dan turte chu mipui leh aiawhte nen sawihona leh zawhna leh chhanna hun neih zui a ni.
Kumin ‘World Humanitarian Day’-ah hian ‘Khawvela inpumkhatna tihchak leh midangte tanpuina kawnga khawtlang hmasawnna ngaih pawimawh bik’ tih thupui hmangin hun hman a ni a, midangte puihna kawnga inhmangte hlutna leh khawvel puma thawhho pawimawhzia tar lan a ni.