Chief Minister Lalduhoma hovin a pisaa Mizoram Liquor (Prohibition) Amendment Act, 2025 hnuaia local fruit beer manufacturer leh winery licence pek chhuah tur ngaihtuaha thutkhawmah dilna lut 99 zingah mi/firm 11 dilna pawm a ni a, dilna dang 13-te chu hun pek belha endik leh phawt tura rel a ni.
Thutkhawmah hian sorkar policy zawm chunga Mizoram chhunga thlai tharchhuah hmanga fruit beer leh wine siamchhuah chungchang ngaihtuahho a ni a. Mizorama tharchhuah ngei thlai leh thei hrisel leh thianghlim taka sawngbawl dan leh, kuthnathawktuten man man zawka an thlai leh thei tharchhuahte an hralh theih dan tur sawiho a ni.
Chief Minister Lalduhoma chuan sorkarin kut hnathawktute a ngaih pawimawh hmasak ber thu sawiin, an thei leh thlai tharchhuahte man man zawka an hralh theihna tur remchang siamsak a nih avangin lawmawm a tih thu a sawi a. Tunlai thiamna nen inmil leh mihring hriselna ngai pawimawh chunga food safety standard zawm tlat chu tihmakmawh a nih thu a sawi bawk.
Selection Committee chuan local fruit beer leh wine siam dil mi 96 leh winery din dil mi pathum, an zavaiin interview leh an hmunhma endikna hmanga an tehfung hmante powerpoint presentation hmangin an sawhfiah a. Tehfung hman zingah hian food safety guidelines zawm dante, hmanrua leh khawl puitling an neih dan te, sum leh mihring neih dan te leh Mizoram ngeia thei leh thlai tharchhuah hmang turin an tlin tawk dan te a tel a ni.
Thutkhawmah hian hmalak chhunzawm dan tur leh licence dil duhte tana hun hawn belh zui zel rel a ni a. Licence hmu turte tan Standard Operating Procedure (SOP) mumal tak duan sak nise tiin, process zawh nia training neih pui leh kuthnathawktute nena inzawmna thuk zawk siamsak zui rel a ni bawk.
Thutkhawmah hian Excise Minister Lalnghinglova Hmar leh Selection Committee member-te an tel a. Selection Committee-ah hian Commerce & Industries, Excise and Narcotics Department, Horticulture Department, Food & Drugs Administration aiawhte bakah Mizoram University leh mi mal he mi kawnga thiamna bik neite an tel a, Handholding CEO a tel bawk.