Aizawl: Adviser to Chief Minister (Finance & Planning) leh bialtu MLA ni bawk TBC Lalvenchhunga chuan Ningani khan Sakawrtuichhun panna kawng, Ramrikawn Zihnghalkawn inkar kawng siam mek a hmunah kalin a endik.
Amah lo dawngsawngtu khawtlang hruaitute kawmin TBC Lalvenchhunga chuan, kawng siam mek leh fur innangching avanga mipuiin harsatna an tawh mek chu sorkarin a hriatpui tih a sawi a. Mipui mamawh hre reng chungin sorkarin ngawrh takin kawng siamthat hna a kalpui zel tih a sawi.
He kawng chu double lane-a siamna tur sorkar hmasa hunah Central Road Fund hmuh tawh nih mah se, land acquisition tihfel a nih loh avangin hun rei tak a khaihlak thu a sawi a. Sorkarin nasa taka a bawhzui hnuah tan a lo ni ta chu lawmawm a tih thu sawiin, pavement siamna atana funding sanction tel a nih loh avangin leh land acquisition thenkhat tihfel ngai a la awm avangin duh angin a chak theih rih loh thu a sawi bawk.
Joint Action Committee on Sakawrtuichhun Road ten thuneitute hnena lehkha an thlen tawh chungchangah, line department leh Central Ministry lamah pavement siamna atana funding hi chak taka bawhzui mek a nih thu, bialtu MLA hian a sawi a.
He hunah hian PWD engineer-te, Aizawl DC official-te, Revenue Department surveyor-te leh khawtlang hruaituten MLA hi an tawiawm a ni.