Aizawl: Chief Minister hlui, MNF President Zoramthanga chuan Ningani khan Gauhati University, Phanidhar Dutta Seminar Hall-a ama puala buatsaih ‘Special Lecture-Cum Interactive Programme’-ah khuallian niin a hmanpui a. He hunah hian Gauhati University chuan kum 1966-a D.M College, Imphal atanga a Bachelor of Arts (B.A) degree pass certificate an hlan.
Zoramthanga hian kum 1966 khan D.M College (Gauhati University hnuaia awm thin)-a English Major a exam zawh veleh MNF ram zalenna sualna hnam movement a zawm tak avang leh, a hnu zela politics-a a hun pum a hman tak avangin a certificate hi a la hman lo a ni.
Gauhati University-a a hun hmanna thupui hi ‘From Guerrilla Fighter to a Peacemaker by Shri Zoramthanga’ tih niin, GUINEIS leh OKDISCD ten an buatsaih a ni.
Zoramthanga chuan he hun ropui tak buatsaihtute chungah lawmthu sawiin, a tana mellung pawimawh leh hriatreng tur a nih thu a sawi.
Certificate hlanna neih zawh hian University zirtirtute leh zirlaite nen zawhna leh chhanna hlawhtling tak neih zui a ni bawk.
He hun hi Vice Chancellor Prof. Nani Gopal Mahanta chuan a hawng a, OKDISCD Chairperson Shri Subhash Chandra Das, IAS (Rtd.) chu Guest of Honour a ni.
Zoramthanga hi MNF Sr. Vice President Dr. R. Lalthangliana, MLA leh MNF General hqrs leh MNYF hruaituten an tawiawm a ni.