Aizawl: Mizoram State Health Care Society (MSHCS) leh Synod Hospital, Durtlang te inremna (MUHCS) leh a man bithliah dan RTI Act hmanga tlangzarh tura Mizoram State Information Commission-in thupek a lo chhuah tawh chu Gauhati High Court, Aizawl Bench chuan a thiat a. Dan dik tak zawmin, Synod Hospital (third party) hnena insawi fiahna hun siamsak hnua thupek thar chhuah leh turin commission hi a hriattir.
He thubuai hi RTI diltu pakhatin MSHCS leh Synod Hospital-te inremna lehkha leh a man bithliah dante dilna atanga lo piang a ni. MSHCS chuan inremna lehkhaah hian thuruk vawn a nih tur thu (confidentiality clause) a tel avangin pek chhuah a harsa ti mah se, information commission chuan April 9, 2026 khan a thlawna pe turin thu a lo pe tawh a. He thupek hi MSHCS chuan Synod Hospital insawi fiahna hun pe lova chhuah a ni tiin high court-ah an khing ta a ni.
Court chuan Synod Hospital chu RTI Act hnuaia Section 2(n) anga ‘third party’ a nih avangin Section 11 leh 19(4)-na zawmin confidential information tlangzarh a nih hmain hriattirna leh insawi fiahna hun pek ngei tur a ni tiin a tar lang a. Synod Hospital sawi duh pawh ngaithla lova thutlukna siam a nih avangin commission order hi a ding chang thei lo tih court chuan a sawi.
Court chuan he inremnaah hian mipuite enkawlna tura sorkar ruahmanna leh mipui pawisa a huam tel avangin langtlang taka thiltih a ngai hle tih a sawi bawk.
Mipui hamthatna chu sumdawnna lam thuruk vawn aiin a pawimawh zawk tih tar langin MSHCS hi RTI Act venhimna hnuaiah an fihlim bik lo tih a tar lang a. Chutihrualin dan kalhmang zawm a nih ngeia a ngaih sak avangin, Synod Hospital hnenah notice thawna dan anga thutlukna thar siam leh turin thubuai hi information commission-ah a thawn kir ta a ni.