Aizawl: Mualthuam North-a H. Lalramdinpuii tualthih chungchanga thubuai, Lunglei Police Station Case No. 84/2026 u/s 103(1)/140(1) BNS hmanga chhui mekah rinhlelh kai mi pahnih an inpuang a, Lunglei Police Special Investigation Team (SIT) te chuan Nilaini khan an man nghal.
SIT te hian a tir atangin uluk takin he thubuai hi an chhui a, rinhlelh kai, Mualthuam North ve ve, Denghmingthanga (20) leh Lalneihkima (34) te chu vawi tam tak thu an zawt fiah tawh a. Police-te chuan an phone hman dan (digital evidence) leh forensic evidence atanga rinhlelhna awmte chik taka an chhui hnuah zawhna chi hrang hrang an hmachhawn a, Ningani khan an pahnih hian SIT-te hmaah an inpuang ta a ni.
An inpuanna hi bawhzuiin dan ang takin Ningani chawhnu dar 1 khan man an ni a, chawhnu vek khan Judicial Custody-ah dah chhunzawm an ni bawk.
Tualthahna thil thlen dan kimchang leh finfiahna (evidence) hrang hrangte erawh chhui hna la kalpui mek avangin leh case chhui zelna a tihbuai lohnan tar lan a la ni rih lo va. Police-te chuan mipuite chu hnuchhuitute hmalakna ngaichang zel tur leh mahni thua hma la mai lo turin an ngen zui bawk.