Aizawl: Health Minister Lalrinpuii’n Mizoramin cancer natna a hluar avangin cancer research centre changtlung zawk a mamawh thu a sawi.
Banaras Hindu University (BHU), Varanasi, Uttar Pradesh-a Swatantra Bhawan Auditorium-ah Pathianni khan 7th Global Cancer Summit chu health minister-i’n a hmanpui.
Kumin summit thupui, ‘Living with cancer in the 21st Century’ tih hmanga inkhawmah minister chuan India-a cancer sanna ber Mizoram dinhmun leh harsatna hrang hrangte sawiin, state chhunga cancer research centre changtlung zawk neih a pawimawh tawh hle thu a sawi.
Minister Lalrinpuii chuan Mizorama zuk leh hmuam ti an tam avanga cancer natna hrang hrang a hluar thu leh hmeichhia chhul cancer venna HPV vaccine chungchanga hmalakna hrang hrangte a sawi a. Mizoram hmasawnna tura cancer zirchianna hmun changtlung zawk neih a nih theih nan sorkar laipui hnuaia ICMR leh Department of Science & Technology te nen tang tlanga hma lak pui tura an inhawn thu mi thiamte nen inkawmhonaah a sawi.
He summit-ah hian cancer natna chungchanga mi thiam leh researcher hmingthang tak takten paper presentation hrang hrang an nei a. Mizorama cancer natna hluar chhan zirbingna leh enkawlna kawng tihchangtlun dan tur kawng dappui tura an inhawn thu Minister hi an hrilh a ni.