New Delhi Mizoram House-a Chief Minister Lalduhoma leh BRICS Entrepreneur Alliance (BEA) Global President & CEO Dr. Bhaskar Jyoti Sonowal te inkawmna kal zelah, BEA team-te chuan Mizoram tlawhin Thawhtanni khan CM Conference Hall-ah chief minister hovin an thukhawm.
Thutkhawmah hian Chief Minister Lalduhoma chuan carbon trading, sawhthing sawngbawlna leh tourism-te chu Mizoram sorkarin BEA nena thawhdunna kalpui hmasak a duhnate an nih thu sawiin, BEA lamin chak taka an rawn umzui avangin lawmthu a sawi.
Thawhpui firm leh company hrang hrangte pawhin Mizorama hma an lakna laite an sawifiah a, Florata Bio Complex, Russia-in thlai tana Bio Stimulant hman dan tur te, Maximeyz-ten Tourism phochhuah dan tur te, leh Carbon Project Developer Jatin Kapur-a’n Carbon Credit (ARR, Blue Carbon, BECCS leh Biochar) hmanga thingtlang mite eizawnna siamsak leh private investment hmanga sum lak luh dan tur te an tar lang a ni.
Mizoram khualzin hip kawngah hian state hmingthang dangte inel lova experience-led destination siam a, high-net-worth urbans, corporate worker leh Gen Z khualzinte hip tum a nih thu sawi a ni a. Israel company-te atangin Micro Drip Irrigation, Climate Control Green House, Drone Logistics leh Security lama hmalak theihna te, sawhthing sawngbawl a international market-a hralh dan tur te pawh thlirho a ni.
Thutkhawmah hian Minister C. Lalsawivunga, Lalthansanga, P.C. Vanlalruata, Rajya Sabha MP K. Laltluangkima leh Adviser to CM Lalmuanpuia Punte, Adviser to CM Dr. KC Lalmalsawmzauva te bakah official dangte an tel a ni.