Mizoram Pro-Active Governance and Timely Implementation (Mi-PRAGATI) thutkhawmah hmasawnna hna lian zualte thlirho a ni a; district headquarters zawng zawng thlunzawmna tur Mizo Fiber Grid Network (MFGN) chu December 2026-a zawh hman tum a nih thu sawi a ni.
Chief Minister Lalduhoma kaihhruaina hnuaiah Thawhtanni khan CM’s Conference Hall-ah Mi-PRAGATI thutkhawm neih a ni a. He thutkhawmah hian state chhunga hmasawnna hna lian zual thlanchhuahte thlir hovin kawng hrang hranga hmalak zel dan tur sawi ho a ni.
Thutkhawma thlirho zingah hian Thenzawl Peace City Master Plan (2045) telin, a hmalakna hmasa atan Solid Waste Management, Dilpui Lake cheibawl leh Saturday Market thar siam tihte thawh hmasak tum a ni a. Swadesh Darshan 2.0 hnuaia Thingsulthliaha Central YMA Conference Centre Rs vbc 99.71 senga sak mek chu fur ruahtui avangin hna a kal muan deuh thu tar lan a ni bawk.
District headquarters zawng zawng thlunzawmna tur, MFGN chu December, 2026-a zawh hman tum a ni a, MINECO-a Integrated Office Complex sak mek pawh zaa 15 zawh tawh a ni a. Mizoram leh Bangladesh inkalpawhna tur Pukzing-Silsury kawng laih mek pawh thlirho niin January, 2028-a zawh hman tum a ni.
Thutkhawmah hian cabinet minister-te leh senior official-te an tel a, fur ruahtui vanga hna kal muan chhante leh zangnadawmna chungchanga harsatna awmte sutkian dan tur kawng hrang hrang an sawi ho bawk.