Aizawl: Hnamro Hall, Dawrpui Jail Vengah Young Women’s Christian Association (YWCA), Aizawl leh Social Wing Committee (SWC), General PYD te tangkawp chuan ‘Faith Based Organizations’ Response to HIV/AIDS in Mizoram Training of Trainers’ programme Nilaini khan an buatsaih a, HIV/AIDS dona kawnga kohhrante hmalak dan tur hrang hrangte an sawiho.
He programme hi SWC Chairman Lalnunpuia Pachuau chuan kaihruaiin, SWC Secretary F. Lallawmzuala leh YWCA Secretary Malsawmkimi te chuan inhmelhriattirna hun an hmang a. YWCA President Dr. A. Lalchhandami chuan introductory speech neiin, HIV/AIDS laka fimkhur dan tur zirtirna a pe bawk.
Programme chhung hian Lalremruati Tlau, YWCA chuan Training Manual Orientation a neihpui a, Lalmuanpuii, YWCA kaihhruainain “Kohhranin engtin nge HIV/AIDS dona kawngah hma kan lak ang?” tih thupui hmangin an sawiho zui a ni.
He training-a an zir manual bu hi HIV/AIDS chungchanga rawngbawltute puitu leh mipuite zirtirna kawnga hmanraw tangkai tak a nih beiseia buatsaih a ni.
Manual bu hi YWCA leh Mizoram-a Kohhran pasarih — Baptist Church of Mizoram (BCM), United Pentecostal Church North East India, Mizoram Presbyterian Church, Seventh Day Adventist, United Pentecostal Church of Mizoram, Roman Catholic (Aizawl Diocese) leh The Salvation Army te tanghoa an buatsaih a ni.