Furpui a thleng a, kan ram kawngte chu a buai leh ta nuai nuai mai. Kiltinah kawngchhia, kawngping, leimin chuan kan chanchinthar a luah leh ta zut zut zawng a ni ber e.
Kawngchhia hi ngaiah kan neih tawh ni maite hian a lang a, a mawhphurtute lah chuan ka mawhphurh a ni e ti lem lovin dan leh thupek kengkawhtute lam zawkin lirthei kal vel dan turah buaiin thuchhuah an siam leh ta zung zung zawk a. Hmun hrang hrangah kawngchhiat avanga mamawh harsatna thawm a ri nasa leh bawk.
Eng kan ti nge maw heti em em a kawngchhia buaipui ringawt mai sal atanga kan chhuah theih loh le? Kawng enkawltu ber department PWD hian mawhphurhna kan nei a ni tiin ngaihtuahna han nei se kan harsatna zualpui hi chu a reh mai ang em, tih hi ngaihtuahnaah a awm fo thin.
A bik takin kan chaw lakna kawngpui ber Silchar kawngte hi chu a fur a thala tlang tha pangngaia enkawl tur chu kan ni. Vanduaina bik thleng a leimin rapthlakte hi chu lo hrethiam ta ila, hmun hrang hranga kawng enkawl loh vang liau liau a motor tlan hleithei lo khawpa kan han dah thin hi chu a mawhphurtu zawnchhuaha hremna in pek chu a hun ve tawh a ni.
Kan kawngte enkawl loh vang liau liau a harsatna thleng hi tu in nge ngaihthah a, fur thlen hmaa a chhiat dan tur hriat lawk theih reng ngaihsak lo lui tlat? Kan ram inenkawlnaah mipui tawrhna rapthlak thlentu an ni. Inhremna awm lo lutuk hi mawhphurhna ti ngaihthahtu a ni tih i ngaihtuah ang u.