Tyson Fury chuan mi tam tak nghahhlelh, Anthony Joshua nena an inhnek tur chu puitlin loh theih a ni tih a sawi a, an inhnek tur tikhawtlai turin Joshua lamin sum tam zawk an phut thar vangin sawi chian theih a ni lo tih a sawi.
Heavyweight champion hlui, Fury hian Joshua promoter Eddie Hearn chu nasa takin a bei bawk a, inbiaknaa tel dangte leh Hearn chu sum tam zawk phutah a puh a ni.
Fury leh Joshua te inhnek tur hi hun rei tak atanga khawvelin an lo nghahhlelh tawh niin heavyweight boxer pahnihte hi New York khawpuia Madison Square Garden-ah November 20-ah inhnek thei tura ruahman a ni.
An inhnek tur hi tihchian a la ni lo va, an inhnekna hmun tur ruahman nena inzawm sum leh pai chungchang ah inbiakna chuan harsatna a tawk mek a ni.
Hearn-a chuan New York-a inhnekna buatsaih a nih huna chhiah pek tur phuhruk nan hian sum tam zawk a phut niin tar lan a ni.
Kum 38 mi, Fury hian treadmill-a a tlan lai video atangin he thil hi a sawi chhuak a, sum an phut tam lutuk avangin inbiakna a fel thei lo niin a sawi.
“In hnena thu thar sawi lawk tur ka nei a, inhnek tur hian hming kan ziak dawn lo niin a lang a, a thlen pawh a rinawm ta lo. Eddie Hearn leh a pawlten sum tam zawk an duh vang vek a ni,” a ti.
“Kum rei lo te liam ta chhung khan Eddie leh AJ te hian sum tam tak an lo hlawh chhuak tawh a. Boxing thuthlung an nei a, darts thuthlung an nei a, snooker thuthlung an nei a, engkim an nei tawh a ni,” a ti bawk.
Fury hian a lungawi loh thu sawi zuiin inhnek lian tham tak tur inbiakna a la kal zel lai hian Hearn leh Joshua te chu a sawisel chhunzawm bawk a ni.
Fury leh Joshua te inhnek tur hi kum tam tak chhung boxing khawvela miten an nghahhlelh berte zinga mi a ni a, boxer pahnihte hian world title an lo kawl ve ve tawh a ni.