Aizawl: Mizoram Legislative Assembly Session neih zawh takah Mizo Peace Accord (kum 1966-a Memorandum of Settlement sign) chungchangah Chief Minister Lalduhoma chuan MNF party chu debate-puiah a sawm.
Ningani Assembly Session-ah MNF MLA Dr. R. Lalthangliana chuan Calling Attention Motion a put lut a. Tun hnaia Law Minister ni bawk Chief Minister Lalduhoma’n Govt. Mizoram Law College-a thu a sawinaah ‘kum 1986-a Memorandum of Settlement sign hi Mizoram leh India inremna ni lovin, Mizorama party pakhat leh home ministry inremna a ni a, a ropui tehchiam lo’ tia a sawi chuan Mizote inkara inhnialna a siam thu leh, hei hi reh ve tawh se a duh thu a sawi.
Motion hi House Leader, Chief Minister Lalduhoma’n chhangin he thil chungchang hi an sawi fiah thei reng a ni tiin a sawi a. Lalduhoma chuan, “Hemi chungchang hi in sawi chhunzawm fo dawn a nih chuan Mizoram mipuiten thu dik a taka an hriat fiah zawk theih nan MNF chuan an party atangin an duh ber thlang chhuak se, kei nen ngeia live debate neihpui turin ka rawt a ni,” a ti.
Chief minister hian MNF President Zoramthanga leh Laldenga fanu (L) te pawhin MNF leh India sorkar inremna a ni tia an sawi laia tumah hawtu awm miah lova ama sawi opposition-in an haw ta bik chu a hriatthiam loh thu a sawi bawk.