Mizoram Pradesh Congress Committee (MPCC) chuan BJP sorkarin ram mipuite National Song, ‘Vande Mataram’ a vaia sak luihtir a tumna chu ram leh hnam, sakhua a hum zel theih nan an do zel dawn tih an sawi a. FCRA Bill phei chu ram, hnam leh sakhua a him zel nan an do zel dawn tih an puang.
Ningania Aizawl Press Club-a thuthar thehdarhtute an kawmnaah MPCC President Lal Thanzara chuan August 19-a Congress Working Committee (CWC) inhmukhawm chuan BJP sorkar thil tum hi ngun taka an ngaihtuah hnuah thutlukna an siam thu a sawi a. Kum 1937-a CWC rel tawh angin ‘Vande Mataram’ hi a chang 1-na leh 2-na chauh sak nise an tih thu a sawi.
Lal Thanzara chuan he hla chang 1-na leh 2-na hi ram hmangaihna thu leh hla (patriotic) a nih laiin, a chang dang erawh Hindu pathian, Durga leh Lakshmi biakna leh fakna thu a ni a. Chuvangin, sakhaw dang betu leh ringtute tan avaia sak zawh ve chu a rem ve lo tih a sawi a. India chu sakhua zalenna ram a nih angin hnam leh sakhua inthliarna awm lova zalen taka khawsak ho an duh thu an sawi a. Ram, hnam leh sakhua a him zel theih nan Vande Mataram a vaia sak luihtir tumna chu an do zel dawn tih a sawi.
Foreign Contribution (Regulation) Amendment Bill, 2026 pawh an dodal tlat thu a sawi a. He bill thil tum ber hi ram pawn atanga tanpuina hmanga minority leh Kristian-ten mipui tana school, college, hospital leh charity home an lo din te chu chhuanlam chi hrang hrang hmanga tihtawp leh chhuhsak tumna a ni tiin, bill-ah hian chiang taka a inziah avangin Congress party chuan tha an ti lo va, an do chhunzawm zel dawn tih a sawi bawk.