Aizawl: Supreme Court thupek angin Serchhip district-ah bawlhhlawh sawngbawl dan thar, ‘SWM Rules 2026’ chak taka kalpui mek zel a ni.
Bawlhhlawh chi li-a thliar hranna pawh tihhlawhtlin chhoh zel niin August 27, 2026 khan PHE Serchhip WATSAN Division-a Sr. Executive Engineer, Isaac Lalchhuanmawia chuan, Rural Area, pilot village atana thlan khaw pali – Leng, Sailulak, Sialsir leh Baktawng Tlangnuam-ah te hian bawlhlawh chi li-a thliar hranna tur bawm a sem.
Serchhip district Urban Area-ah New Serchhip North leh South VC area-ah te bawlhhlawh chi li-a thliar hranna hi August 2026 atangin kalpui tan a ni tawh bawk a. Serchhip district Bawrhsap Paul L. Khuma kaihhruaina hnuaiah Special Cell din niin, Action Plan mumal tak duan a ni tawh bawk a, Serchhip, Thenzawl leh N. Vanlaiphai-ah te bawlhhlawh sawngbawlna hmunpui din mek niin chak taka hma lak zui mek reng a ni.
Rural Area-a bawlhhlawh thliar hna enkawlzui hi PHE Department kutah awmin Urban Area hi District Urban Development Office (DUDO) kutah a awm thung a ni.
Heng hmalaknate hi mipuite tana phurrit siam tumna a ni lo va; e-waste leh sanitary waste (diaper, pad etc.) te phei chu hautak thama tam a awm lo tura ngaih a ni a, chuvangin lo huphurh a, lo chi-ai mai lo tura ngen an ni a. Khaw nuam leh hrisel, khua leh tuiten rilru leh taksa hrisel zawk an neih theihna tur te, an tu leh fa lo la awm lehzel turte tan pawha ram nuam leh hrisel siamna tura hmalakna a ni tih hriaa, lo thlawp tlat turin, mi tinte ngen leh hriattir an ni.