Aizawl: Sateek Multipurpose Primary Agriculture Credit Society (MPACS) Ltd. chu Inrinni khan tlangzarh a ni.
Tlangzarh inkhawm hi Mizoram Cooperative Apex Bank (MCAB) Ltd. Chairman Lalnunsanga chuan khuallian niin a hmanpui a, H. Remsangpuia (AG-I, MCAB Ltd.) leh Lalramzauva (Maubuang MPACS) ten an tawiawm a ni.
Khuallian Lalnunsanga chuan Sateek khuain MPACS anga hma an la ta chu lawmawm a tih thu sawiin, MPACS hi khawtlang hmasawnna atana thil tangkai tak leh bank anga function thei a nih thu a sawi a. Deposit lakhawma loan pe thei society an nih bakah, an mamawh ang zela Apex Bank atanga borrowing la thei an nih thu a sawi bawk.
Sateek MPACS hi Multipurpose Cooperative Society tha tak an nih avangin MPACS anga an hnathawhnaah harsatna an neih a rin loh thu Lalnunsanga chuan a sawi a, chutihrualin hruaitute thawhhona tha leh rinawmna a pawimawh thu a sawi bawk.
Programme hman zawh hian member-te leh a duh apiangte tan account hawnna hun pual hawn nghal a ni.