Aizawl: ZPM kaihhruai Mizoram sorkar chuan department hrang hrang 34 hnuaiah hnathawk tur mi 4,608 a la tawh.
Assembly Fur thutkhawm zawh takah East Tuipui bialtu MLA Ramthanmawia leh Champhai North bialtu MLA H. Ginzalala te zawhna ziaka chhangin, Department of Personnel & Administrative Reforms (DP&AR) minister, Chief Minister Lalduhoma chuan a tar lang.
Chief minister sawi danin, hnathawk lak tawh mi 4,608 te zingah hian a nghet (direct recruitment-regular)-a lak mi 3,152 an awm a, heng bakah hian provisional employee mi 726 leh contract basis-in mi 730 lak an ni bawk.
Sorkar hnuaia hnathawktu lak nan hian Service Rules, Recruitment Rules leh Guidelines mumal tak siam a nih thu sawiin, department tinin hna thar an lak dawn reng rengin dik taka zawm tura ngaih an nih thu a sawi.
Sorkar dan ding lai zawm lova hnathawktu tur lak an lo awm a nih chuan DP&AR chuan a hriatpui lo va, an phalna tel lova hnalak a awm leh awm loh pawh an hre lo tih sawiin chief minister chuan, department hrang hranga sorkar hnaruak awmte hnawhkhah nan Recruitment Rules hman vek a nih thu sawiin, sorkar mamawh dan a zirin hnathawktu turte hi lak zel an tum thu a sawi bawk.