Aizawl: MPCC Vice President Zodintluanga Ralte chuan ZPM sorkar leh Chief Minister Lalduhoma te chu mipui hmaa thutiam hlen lo leh dawt sawiah puhin, chief minister hian mi dang debate-ah cho tawh lovin amah leh amah a inhnial tawk nia a hriat thu a sawi.
He thu hi Inrinnia Sihphir YMA Run-a Sihphir Group Congress Committee te tana political training a neihpuina a sawi a ni a, Ex-Deputy Speaker R. Lalrinawma’n a tawiawm a ni.
Zodintluanga Ralte chuan ZPM sorkar thutiam hrang hrang — chief minister chu car man to-ah a chuang ve dawn lo, car pakhat bak a kawl dawn lo, tih te, restricted tender tihbo te leh thil dang tam tak an intiam tawhte chu a taka tihlawhtling lo leh mipui bum a puhin, Chief Minister Lalduhoma’n assembly house-a MNF-te debate a cho chu thil tul lo tak a nih thu a sawi a. Chief minister hian amah leh amah dawt sawiin a inhnial tawk tawh zawk a ni, a ti.
India ramah leh Mizoramah pawh politics a danglam chak tih a sawi a. Mizoramah mipuiten Congress sorkar an nghakhlel tawh hle nia sawiin, hmasang atanga Congress sorkar hnuaia NLUP, rangva sem, Tuirial Hydel Project leh Falkawn Hospital (ZMC) te chu Congress hmasawnna kutchhuak dik tak a nih thu a sawi bawk.