Aizawl: Mizoram pumah electric smart meter (consumer meter) vuah chu tih ngei ngei tur a nih avangin district zawng zawngah he hna hi kalpui mek a ni a, August 18, 2026 thleng khan consumer meter 78,992 vuah a ni tawh.
He thu hi assembly Fur thutkhawm zawh takah Tuivawl bialtu MLA Lalchhandama Ralte leh Aizawl West III bialtu MLA VL Zaithanzama te zawhna ziaka chhangin Power & Electricity Minister F. Rodingliana chuan a tar lang.
Minister sawi danin Aizawl khawpui chhung bikah smart meter 73,428 vuah a ni tawh a, nakum January thlaa zawh fel hman beisei a ni.
Mizorama he project thawk tur hian Delhi-a Satnam Global Infraprojects Ltd. ruat an ni a, Central sorkar scheme ‘Revamped Distribution Sector Scheme’ (RDSS) hnuaiah smart metering work atan Rs vbc 180.592 hmuh niin Information Technology/ Operational Technology (IT/OT) works atan Rs vbc 9.79 sanction hmuh a ni.
Consumer-te tana smart meter vuah hi a thlawn a nih laiin meter thlunna hrui (service line) a daih loh emaw, thlak a ngai a nih chuan chumi man erawh consumer-te chawi tur a nih thu a sawi bawk.