Assembly thutkhawm zawh takah zawhna ziaka chhangin Home Minister K. Sapdanga chuan, August 20, 2026 thleng khan Mizoramah raltlan lut chhinchhiah mi 38,213 an awm tawh tih a sawi.
Home minister sawi danin raltlan lut chhinchhiah zat zinga a tam ber hi Myanmar atanga lut an ni a, mi 29,575 an awm a. Heng bakah hian Manipur atanga lut mi 6,959 leh Bangladesh atanga lut mi 1,679 an awm bawk.
State sorkar chuan district tin bawrhsap (DC)-te kaltlangin raltlan chhawmdawl hna hi a thawk mek zel a. An awmna tur relief camp-te siamsakin buhfai leh an mamawh hrang hrangte pek thin an ni a. Raltlante enkawlna atan hian sorkar chuan Rs 2,85,39,611 a seng tawh a ni.
Raltlante chhinchhiahna (biometric enrolment) hna pawh chak taka kalpui a ni a. Bangladesh raltlante zaa za chhinchhiah zawh an ni tawh a, Myanmar raltlante pawh zaa 98.90 chhinchhiah zawh an ni tawh bawk.
Home minister chuan raltlante chungchangah hian home affairs ministry atangin tun hnaiah thuchhuah thar engmah dawn a la awm loh thu a sawi bawk a ni.