Supreme Court chuan Inrinnia Cockroach Janta Party (CJP)-in Delhi-a lungawi lohna lantir akawng zawh an tumah inrawlh a tum lo va, sorkar laipui leh Delhi sorkar chu dan leh thupek kenkawhna ruahman tur leh tute pawh muanawm taka che tur leh dan hnuaiah zel thil ti turin a ti.
Chief Justice of India Surya Kant leh justice pahnih, Joymalya Bagchi leh V Mohana te awmna bench chuan kawng zawh tura tharum thawhna thleng thei nia sawiah ‘inralwh a tulna a awm lo’ an ti a, thuneitute erawh kawng zawh chu khawiah nge leh eng anga himin nge kalpui tur tih ngaihtuah turin a ti.
“Tute mah muanawm loh leh dan pela che tura rinhlelh kan nei lo va… Tunah chuan thil lo thlirlawkna thil anga chet ve mai tumna a awm lo,” tiin bench chuan thu a titlu.
“Mi tinin dan an zawma dan ang taka an chet leh mi tin dikna chanvo an zahsak kan ring a, fundamental rights a ni emaw, statutory rights pawh ni se, dan hnuaiah vek a awm a ni,” tiin bench chuan a sawi.
Court hian Shivam Upadhyay leh Delhi police officer chawl tawh, Rajendra Singh-a ngenna thehluh, Delhi-a venhimna khauhna lai, India Gate leh Central Vista chhehvela liantham taka chetna, kawng zawh leh lungawi lohna lantirte chu khuahkhirhna siam turin an thlen a, bench hian a ngaihtuah a ni.
Ngenna hi advocate Pulkit Agarwal kaltlanga thlen niin Inrinnia CJP kawng zawh tur hi September 12 leh 13-a BRICS Summit neih tur a nih bawk avangin sawn emaw, thlak emaw turin ngen a ni.
Singh-a aiawha ding, advocate Rizwan Ahmad chuan a huaihawttu turte hian a hma pawhin police phalna la hmasa lovin kawng an zawh tawh niin a sawi a. “September 5-ah chutiang bawk chu engtin nge an huaihawt leh theih? Phalna an nei lo va, hei hian dan awm lohna a thlen a ni,” a ti a ni.
Court hi BRICS Summit zawh hnuah ti tura thu pe turin a ti a, Delhi chu khawvel huap intawh khawmna lian thleng tura a inbuatsaih lai a nih avangin sawn hlattir turin a ngen a ni.
Bench chuan hei hi a hnawlsak a, dan leh thupek kenkawh chu sorkar laipui leh Delhi sorkjar kut a ni a, anni chuan dan ang taka thil an tiha dan leh thupek kenkawhna pawh tha taka an vawn a ngaih thu a sawi a ni.
CJP chuan Inrinnia kawng zawh an tum hi August 24 khan puangin India Gate atangin Delhi police headquarters thleng ‘peaceful march’ neih a ni dawn tih an sawi a. Hetah hian zawhna put ru avanga National Eligibility cum Entrance Test (NEET) examination cancel tak avanga zirlai intihlum chhungten hma an hruai dawn a, July 20-a police-in an kawng zawh kut an thlakna duh lohna an lantir nghal dawn a ni.
CJP hian kawng an zawh tur hi July 25-a sorkar laipuiin Jantar Mantar-a ni 36 chhung lungawi lohna an lantir titawp tura an ngennaa tihhlawhtlin an tiamte an la tih loh nawrna a ni bawk.