Aizawl: Lok Sabha-a Opposition Leader Rahul Gandhi laka Uttarakhand Police ten FIR an ziak lut chu Mizoram Pradesh Congress Committee (MPCC) chuan chi leh chi inthliarna thup tumna leh sorkar khawl hmanga phuba lakna politics tenawm a ni tiin an dem.
MPCC thuchhuah tar lan danin Congress President Mallikarjun Kharge-a’n Haldwani-a vantlang inkhawm a neihna lungtena BJP-RSS thawktuten ‘thianghlimna ritual’ tiin chi leh chi inthliarna nasa tak an tih duh lovin Lok Sabha-a Opposition Leader Gandhi chuan huaisen leh tumruh taka press conference nei zui a, a titute laka hremna na tak pek leh an laka FIR ziak lut ngei turin a phut a ni.
He chetna laka dan anga hremna lek tura a phut avangin Uttarakhand-a BJP sorkar thuneihna hnuaia awm police-te chuan Gandhi zawk hi Haldwani City Kotwali Police Station-ah FIR an lo ziak luhsak zawk a ni.
MPCC chuan BJP-in Hindutva dinchantir tuma chi leh chi inthliarna leh Dalit-te chunga hleilenna thleng thinte thup mawi a, Opposition leader a beih letna hi khawtlang nun hona tichhetu lian ber a ni tih a tilang chiang hle tih an sawi.
Mizoram Congress chuan constitution-a rualkhai taka nun hona hlutna mausamtu te an do zel dawn tih an tar lang bawk.