Aizawl: Sorkar laipuiin FCRA bill chu Joint Parliamentary Committee (JPC)-ah a dah chhan chu Chief Minister Lalduhoma leh kohhran hruaituten union home minister an hmuh tak vang a ni tih Union Home Minister Amit Shah ngeiin a nemnghet tih Rajya Sabha MP K. Laltluangkima’n a sawi.
Thawhtanni khan ZPM party pisa-a chhung inkhawm neih a ni a, he huna thu sawitu MP K. Laltluangkima chuan MP lakluh hlima central ram hruaitu mi pawimawh tak tak a hmuh zinga Union Home Minister Amit Shah a hmuh tuma an inbiaknaah, FCRA chungchanga Mizoram hruaitute hmalakna chu vawiin thlenga central-in a ngaih pawimawhzia a sawi a. JPC-ah hian Lok Sabha leh Rajya Sabha atangin MP 10 ve ve awmin he hmalakna hi an ngaihtuah chhunzawm dawn tih a sawi.
K. Laltluangkima chuan ZPM sorkar mek chu kalphung thar langtlang leh dik taka hna a lak dan te, kuthnathawktute khaichhuahna lamah te a hlawhtling thawkhat hle tiin a sawi. Buhfai buk dik lo te, aikal lak te, leh pension hlawh dik lova lak thin te tihtawp a nih bakah, party worker te work order cancel sak ang chi te pawh a awm loh thu sawiin, kum 2028-a sorkar nawn leh ngei turin ZPM sorkar chuan hma a la chho mek tih a sawi.