Mizo National Youth Front (MNYF) President Gogo Lalremtluanga chuan Assembly House-a Chief Minister Lalduhoma’n Memorandum of Settlement chungchanga debate a rawt chu a chhang let a, debate neih hun tur a rawt nghal.
Thawhtannia MNF Hnam Runa chhung inkhawmah thusawiin MNF |halai President Gogo Lalremtluanga chuan August 27, 2026 a 9th Mizoram Legislative Assembly an neiha Chief Minister Lalduhoma’n MNF te debate-a a chona chu a pawm thu sawiin, debate neih hun atan hian sorkar chawlh, October 2, 2026 an rawt thu a sawi a. Debate an neih hunah Mizo mipuiten zau zawka an hmuh theih nan live telecast ngei ni bawk se a ti a, a hun leh a hmun tur erawh inbiak remna ang ni se a ti.
Gogo Lalremtluanga chuan MNF party chu kum 65 chhung Mizo hnam meichher mit loa vawiin thlenga chelh ding tlattu, party nghelnghet leh rulhrel nghet tak nei an nih rualin, hun danglam zel mila an insiamrem a ngai tih a sawi a. Anmahnia fel lo lai te, siam rem leh siam that ngaite siamthaa, Mizo nationalism tha nen, Mizo hnam movement bul an tan that a ngaih thu a sawi a. Mizo mipuiten en chhin sorkar aia tha zawk sorkar an duh a tih sawiin, sorkar tha, kalphung dik leh nghet pe turin MNF te an inpuahchah mek thu a sawi bawk.