Aizawl: Manipal Hospital hotuten an damdawi ina thawktu tur, tawnhriat nei Mizo nurse tam zawk lak belh an duh thu Health Minister Lalrinpuii an hrilh.
Thawhtanni khan a pisa, MINECO-ah Manipal Hospital hotute chuan minister hi an hmu a. Hemi rual hian Directorate of Nursing hnuaia recruitment cell hmalaknain Directorate of Nursing-ah tawnhriat nei Mizo nurse-te lakna tur walk-in interview hi neih nghal a ni.
He hunah hian health department leh nursing directorate hotute bakah Synod Hospital College of Nursing, Mizoram College of Nursing, Blessino Nursing School leh Apollo School of Nursing hotute pawh an tel a ni.
An inkawmnaa Manipal Hospital hotute sawi danin, Mizoram atanga damlo kal te tan bika an ruahman, damlo khum indaih lohna avanga khum 35 awmna day care centre thar an hawn thute an sawi a. Tawnhriat nei Mizo nurse tam zawk hnathawk tura lak belh an duh thu an sawi bawk.
Manipal Hospital hi India-a hospital 49 nei mektu leh a nei tha berte zinga mi niin chung zinga hospital pangate chu Mizoram Universal Health Care Scheme (MUHCS) hnuaiah empanelled an ni bawk.