Indian tlangval, sipaia \an tum, hna \ul avanga exercise la hman si lo, zanlaia a hnathawk bâng tlan haw \hin video an lak fuh chu nasa takin a darh mek a, amah puih duh pawh an tam nghal hle.
Video hi film siamtu, Vinod Kapri-a lak niin kum 19 mi, Pradeep Mehra-a hi a car-a a tlan pelh pahin an inkawm a ni.
Mehra hi a car-a chuang turin a sawm a; mahse, ani chuan zan tin a hna thawk haw chu km 10 zet in lam pana a tlan haw \hin thu leh hei hi Indian Army-a \an ngei a tum vang a nih thu a sawi.
Pathianni zan khan video hi internet-ah dah chhuah a ni a, Thawh\anni chawhnu thleng khan mi maktaduai ruk chuangin an thlir tawh.
Mehra-a hi Delhi dai, Noida-a McDonald-a thawk a ni a, zan lam hun changin a haw lam chu Kapri nen an intawng a ni.
Film siamtu hian backpack nena zan laia tlan ta chu harsatna eng emaw nei a nih ring zawkin an tlan pah chuan a kawm zui ta a ni.
Video hi a car a\anga a lak a ni a, a ruala haw tura a sawma a hnar dan chu mak a ti hle a ni.
Twitter-a video a dahah pawh, “Hetianga a tih chhan i hriat chuan i ngaina ngei ang,” tiin a dah.
Mehra hi a unaupa nen Noida-ah hian khawsain exercise lakna hun a neih loh avangin zan tin a hna thawk haw chu a hmang \angkai ta a ni.
Kapri-a’n a ruala haw tur a sawm pawh hian, “Ka routine a buai phah dawn,” tiin nui chungin a chhang mai a ni.
Zanriah eipuia a sawm pawhin Mehra hian a hnar a, amah leh a unaupa, zan lama hna thawk ve tho tana ei siam a ngaih zawk thu a hrilh a ni.
Zinga a tlan loh chhan a zawh pawhin Mehra hian thawh veleh ei rawng bawla hna kal nghal a ngaih \hin thu a sawi.
A nu leh pate chu Uttarakhand-ah awmin a pain a nu damlo a enkawl mek tih a sawi.
Kapri-a’n an video a thehdarh dawn tih a hrilh pawhin, “Tumahin min ngaihven lo. Lo dah pawh ni se a pawi lo, engmah thil dik lo ka ti hlei nem,” tiin nui chungin a chhang a ni.
Video a darh hnuah hian mi tam takin social media-ah an sawi zui a, a tumruhna an fak hle.
“Khawvelin a hria che, Pradeep,” tiin pakhat chuan Twitter hmangtu pakhat chuan a sawi a. Delhi Deputy Chief Minister Manish Sisodia pawhin video chu a en nin theih loh thu a sawi.
“Sorkar hna thawk leh politician-te chu he nau tumruhna leh a beihna lakah hian chuan an tê hle a ni,” a ti.
Lieutenant General Satish Dua (Retired) pawhin Indian Arm-a hotu sang hnenah Mehra inbuatsaihna chu a hrilh hial thu a sawi.
Samajwadi Party chuan Mehra zirna leh a nu damdawi inenkawlna tumsak an tiam nghal.
India-a milar tam takin an fak bawk.
Pathianni zan khan Kapri hian Mehra hi a hmu leh a. Mi hrang hrang a\anga betu a tawn tam thu a hrilh.
Video darh chungchangah, “Thawhrimna hmaah chuan khawvel hi a bawhhkhup a ni,” a ti.
Hemi zan hi chuan Kapri-a hian an in thleng a thlah a. “Nizan kha chuan ka tlan laklawh kha tawpsan mai ka duh lo a ni,” a ti.