MPCC President Lalsawta chuan ramin a mamawh ber chu sorkar \ha a nih thu sawiin, “MNF pawh hian sorkar \ha neih chu an duh ve ngei a rinawm a, chutih laiin, duhna ringawt hi a tawk lo a, a taka thlentir a ngai a ni,” a ti.
Lunglei Press Club-ah nimin khan thu thar thehdarhtute kawmin Lalsawta hian duhamna leh sum um chung chuan sorkar \ha a siam theih loh thu a sawi a. Dan loa sumdawnnate pawh pawisa awm theihna a nih phawt chuan, ram dan chu MNF sorkarin an hnawl \hin thu a sawi a. Airport chimte pawh a satuin a sak thiam loh vang ni loin, sum duh ve leh ‘kei pawh le’ ti an tam vang a nih a rinawm thu a sawi.
Sorkar \ha nei tur hian duhamna te, induhsakna te, dik lote hi a bo vek a \ul tih sawiin MPCC president hian, “Sorkar \ha siam tur hian Pu Zoramthanga ho hi chuan an thei lo tih a chiang tawh a, Pu Lalduhoma ho hian an theih kan ring bawk lo a, keini chuan kan thei ang tih kan hria, kan inhuam bawk,” a ti a. Ram hruaitute hmathlir \awmpui phak loh vanga dodalnate awm mah se, ram leh mipui tan a \hat dawn phawt chuan sut tlang lui ngam a huaisenna an nei dawn tih a sawi bawk.
MPCC president hian ramin chhiat lam a pan mekna lak a\anga let leh a \ul tih sawiin, “Party dangte chuan inthlan leh hunah sum an nei dawn; mahse, an neih miah loh chu ram hmangaihna a ni. Sum hmanga ram rorelnaa luh tumtute hi kan ram hmelma an ni a, kan hnawk a ngai a ni,” a ti.
Assembly Budget session neih zawh takah ZPM Leader Lalduhoma’n ‘no confidence motion’ put luh a duh chungchang leh an eptupui, Congress MLA-ten venthawn an neih vanga thlawp ngam lo nge an nih tih zawhna chhangin Lalsawta hian, “Sorkar tihmualpho lehzual hi \ul kan ti lo a, mipuiah an mualpho tawh sa a, kan hneh tawh a, kan bawhbet reng tawh avangin ‘i tlawm em?’ la tih zui kher kha \ul kan ti lo,” tiin, sorkar rintawk lohna pu lut pawh nise awmzia neia an hriat loh thu a sawi.
Hemi chungchang MPCC Treasurer Zodintluanga Ralte, MLA in sawi belhin, No Confidence Motion pu lut tur hian MLA 10 tal nih a ngaih thu a sawi a. “ZPM khan put luh an duh a, min rawn bia a. Nileng pawhin sawi ila an tla dawn chuang lo a, Pu Lalduhoma kan khawngaih vang a ni tel bawk a. MP inthlanah min rawn bia a, kan thawhpui tawh a. No Confidence motion pu lut turin min rawn be leh a, hlawhtling tur chuang si loa a mualpho nawn lehna tur kan ven sak avanga min rawn sawmna kha tihhlawhtlinpui lo mai kan ni,” a ti.
Mizoram sorkarin Ministerial Subordinate Services Selection Board (MSSSB) a din chungchang zawhna chhangin MPCC President hian, “MPSC-in sorkar hnathawk tur la turin tlin an intih reng laia, MSSSB din a ni chu thil \ul lo tak a ni,” a ti a. Congress an sorkar chuan MSSSB hi tihtawp nghal a nih tur thu a sawi a. Hei bakah, SEDP Board tih ang chi pawh \ul loa sum tam tak kal ralna anih avangin a awm reng a rem loh thu a sawi bawk.
Lalsawta hian budget session-a supplementary demand sawiho chungchangah, “Sawiho ngei ngei tur ni a, danah pawh a awm. Mahse, a tam zawkin sawiho an ngam tlat loh chuan sawi ho loh a ni mai,” tiin, an hun laia sawiho a nih ngai loh chhan chu sum indaih loh ang ang minister hrang hrangte enkawl department atan dah sa vek a nih \hin vang mai a nih thuin zawhna a chhang.
MPCC President hi MPCC Vice President Lal Thanzara, Treasurer Zodintluanga MLA bakah Joseph Lalhimpuia, Gen. Secy leh C. Lalhmingliana, President, LDCC ten an \awiawm a ni.