Aizawl: Labour, Employment, Skill Development and Entrepreneurship (LESDE) Minister Lalnghinglova Hmar hovin Departmental Review Meeting buatsaih a ni a. Department hnuaia hmalakna, hmachhawp leh inkaihhruai dan hrang hrangte thlirletin hmasawn zelna tur hrang hrang sawiho a ni.
LESDE Directorate, MINECO-a Thawhlehnia thutkhawmah Minister Lalnghinglova Hmar chuan department hmalaknate tha a tih thu leh thawktute inpekna fakawm a tih thu a sawi a. “Sorkar hmalakna chu fimkhur taka kal a ngaih avangin muang angin a lang thin a. Kal dan ngai renga kan kal chuan result ngai reng kan nei dawn a, kal dan thenkhat thlak hret leh tha sen belh inhuam a ngai,” tiin officer kalkhawmte a fuih.
Minister chuan ITI-te tihchangkan a tul thu leh MBOCWWB lama labour cess tlingkhawm pawh danin a phal chhungah chak zawka hman a ngaih thu sawiin, a bikin labour faten zirna leh eizawnna tha zawk an neih theih nan hmalak a pawimawh tih a sawi.
Secretary Dr. Lalhriatzuali Ralte pawhin hmalakna hrang hrangte lawmawm a tih thu sawiin, department scheme-te tana Helpline neih leh rampawna thawkte buaipuitu tur ‘Overseas Employment Cell’ din a tul tawh thu a sawi a, officer-te chu mahni chanpual theuh chak taka bawhzui turin a chah bawk.
He Review Meeting-ah hian Directorate of LESDE, District Office-te, MBOCWWB, MYC, Govt ITI-te leh ESI Dispensary atangin hmalakna hrang hrang Powerpoint Presentation hmanga thlirho a ni a. Technology thar hmanga hmasawn dan tur, ‘New-age Technology – Prospects, Tie-ups & Way Forward’ tih thupui hmanga sawiho a ni bawk.
Hei bakah hian JICA, MSDE leh NSDC tangho buatsaih, ‘JICA Invitation Programme to Japan’ tour report ngaihthlak a ni a, iGOT Karmayogi Platform-a perform tha award leh Best Attendance Certificate hlanna hun hman nghal a ni bawk.