Aizawl: Chief Minister Lalduhoma’n state sum harsatna avanga GST tlahniama a puh chu dik lo tiin BJP Mizoram |halai Headquarters chuan chief minister hi a thusawi tur hre chiang hmasa thin tur leh ‘Mizoram pa’ a nihna ang taka puitlinga khawsa turin thuchhuah an siam.
Thawhtannia an thuchhuahah, chief minister-in Mizorama sum vân chhanah a mawhphurhna la ngam lova puhmawh tur dang dapa, ‘India-a GST tlakhniam vang’ tia a sawi chu mak an tih thu leh zahthlak an tih thu an tar lang. India ram GST pung zawk hi July thla thleng khan Rs vaibelchhe nuai 2.11 a nih thu leh, net revenue pawh kum hmasa aiin zaa 15.8-in a pun hluai thu te, thla 14 chhunga growth rate that ber a nih bakah GDP pawh Q1 FY27-ah zaa 7.8-in a pun thu an sawi.
Mizoram chief minister a ni tih inhriaa a thusawi vawi khat pawimawhziate hriaa khawsa turin an chah a. Opposition ang maia a la khawsa fo chu zahthlak an tih thu sawiin pa dinhmun pawimawhzia hriaa thil tak tak ngaihtuah zawk turin an ngen a ni.
ZPM sorkar chu sorkar hmasaten tax an lak ve ngai loh hmun hrang hrang atanga chhiah tam tak mipui atanga an lak hnuah a hmanna mumal mipui hriat tura puanzar an nei lo nia sawiin, petrol leh diesel-a cess an lak pawh kawng siamna tura an sawi, kawngpui tam tak a chhiat em avangin mak an tih thu an tar lang.
Sorkar hmasate aia tha tura inzuar, an aia chhe zawka sorkarna an kalpui hian mipui leh ZPM sorkar nghakhleltute rilru a tibeidawng hle tih an sawi bawk.