Aizawl: Chief Minister Lalduhoma chuan ruihhlo sim tum tak takte chu sorkar pawhin chhawmdawl a inpeih reng thu a sawi.
Thawhlehni khan CM Conference Hall-ah Lalnunmawii lehkhabu ziah, ‘A tûr a na tawh lo ve’ tih chu chief minister hian a tlangzarh a; he hunah hian a lehkhabu tlangzarh tak hi ngawlvei mekte, an chhungkua leh ruihhlo do hna thawktuten chhiar vek thei se an hlawkpui hle a rin thu a sawi.
Lehkhabu ziaktu Lalnunmawii hi kum 26 zet ngawlveite enkawl hna thawk tawh a ni a, a tawnhriat atanga lehkhabu hlu tak a buatsaih leh ruihhlo do zui zel tura a inpekna hi chief minister chuan ngaihsanawm a tih thu a sawi.
Chief minister chuan ruihhlo do chu sorkar pawhin a ngaih pawimawh thu sawiin YMA, kohhran leh NGO hrang hrangte nen nasa taka hma an lak ho dante a sawi a. Supply reduction leh demand reduction lama hmalaknaten rah tha chhuah zelin ruihhlo pawh a vâng chho mek nia an hriat thu a sawi.
Ruihhlo nghei a theih a ni tih inzirtir thar a tul thu sawiin chief minister chuan, sim tum tak takte chu sorkar pawhin chhawmdawl a inpeih reng thu a sawi a. Hulhhliap Short Stay Centre-ah pawh nghei chauh zirtir lovin mahnia kea an din zui theih nan skill training an pek tel bakah, an zinga mi 21 hnenah Handholding Scheme atangin CM Special Package an pek tak thute a sawi a. After care service an uar hian ruihhlo ti thin, home-a luh hnua chhuaha ti leh mai thin zelho chu a sim hlentir theih an rin thu a sawi bawk.
Lehkhabu tlangzarhna inkhawm hi Central YMA President R. Lalngheta’n a kaihruai a, Lallawmzuala Hauhnar-in lehkhabu thlir lawkna neiin, lehkhabu ziaktu Lalnunmawii’n lehkhabu a ziah dan tlangpui a sawi a ni.