India chuan kum 10 lo awm leh tur chhungin hmun kilkhawr zawkte sorkar laipuiin tlawhpawh theihna tur siamna tur scheme a duan, UDAN hnuaiah thlawhna tumhmun 100 sam belh a tum a, Rs. vaibelchhe 30,000 ruahman a ni tih Union Civil Aviation Minister K Rammohan Naidu-a’n a sawi.
Naidu-a hian Thawhlehni khan Gujarat-a Ahmedabad tumhmunah India-a a pathumna, ‘hub & spoke’ operation a hawng a, hetah hian tumhmun siam belh tur hi a sawi.
“Kum 2014 khan tumhmun 74 a awm a, tunah erawh chuan 166 a awm ta a. Kum 12 liam ta chhung khan ni 40 dan zelah tumhmun thar emaw, terminal thar emaw nei hman ziah ang kan ni,” a ti.
“He kum 12 hi civil aviation ministry zin kawng bul tanna a ni a. ‘UDAN’ scheme hmangin hma kan la nasa a, kum 10 lo awm leh turah pawh hian tumhmun 100 siam tum niin Rs. vaibelchhe 30,000 senna tur a ni,” a ti.
Prime Minister Narendra Modi-a kaihhruaia March thlaa union cabinet thukhawm chuan Regional Connectivity Scheme – Modified UDAN chu 2026-27 atanga 2035-36 chhung hman turin a pawm leh a, sum pawh Rs. vaibelchhe 28,840 dah a ni.
Union minister chuan civil aviation chu ram chhunga sector thang chak ber pakhat a nih thu leh mipuiten rel an kham tawh lo va, thingtlang khuate pawhin thlawhna tumhmun an duh zel tawh tih a sawi.