Aizawl: Mizoram Legislative Assembly Fur thutkhawm neih zawk taka Memorandum of Settlement (MoS) leh Inner Line Regulation (ILR) chungchang debate neihah rorel lai, ZPM party chuan assembly house pawn lama debate neih chu tul an tih tawh loh thu an sawi.
Nilainia ZPM thuchhuah tar lan danin August 27, 2026-a assembly session neih takah khan MNF MLA Dr. Lalthangliana chuan MoS leh ILR chungchangah hian calling attention motion a pu lut a. Hemi hnu hian Chief Minister Lalduhoma chuan a hmuna debate neih a rawt a, Opposition Leader Lalchhandama Ralte pawhin debate neih nan hian session hi ni khat dang pawhsei a rawt bawk a. Amaherawhchu, he rawtna hi speaker-in emaw, a rawttu ngei leh member dang tute mahin an sawi zui tak loh avangin assembly house chhungah debate a ni ta lo.
Hemi hnu Thawhtanni kalta khan MNYF President Gogo Lalremtluanga chuan MNF Hnam Run-a inkhawmah chief minister hi assembly pawn lama debate neihpuiah sawmin, a ni tur te pawh a ruat a ni.
ZPM erawh chuan he issue chungchang hi media hrang hrangah fiah tawk takin sawizui a nih tawh avangin thudik hre duhtute tan a chiang tawk tawh hle niin an hria a, chuvangin Assembly pawn lama debate zui zut hi tul an ti tawh lo tih an tar lang.