Aizawl: November-ah Lungleiah ni thum awh tur ‘Leitlangpui Music Festival (LMF) 2026’ neih a ni leh dawn a. Nilaini khan Tourism Minister Lalnghinglova Hmar hova Organising Committee thukhawm chuan inbuatsaihna hi an sawiho.
LMF 2026 Organising Committee chu an chairman, tourism minister ni bawk, Lalnghinglova Hmar hova a pisaa thutkhawmah hian tourism department-in mawh la bik tura a ruat event management agency (EMA) ‘BBY Animals’ aiawhten ruahmanna an siam dan report an pe a, inbuatsaihna kalpui dan tur sawiho a ni a. Sorkar department hrang hrangte mawhphurhna leh hmalak dan turte sawiho a ni bawk.
Ruahman lawk dan chuan November 11-13, 2026 hian LMF hi neih tur a ni a, a nghahna hmun tur hi Lunglei High Powered Committee (HPC) Vice Chairman V. Malsawmtluanga, MLA hova thlan nise tiin an rel a ni.
Lalnghinglova Hmar chuan a vawi thumna atana LMF inbuatsaihna kalpui tan a ni chu lawmawm a tih thu a sawi a. A hmasa pahnihah hmasawnna tam tak hmuh tur a awm avang leh nikuma phai rock band an tel tawh avangin phai media thlengin Mizoram hming a chawi lian tih a sawi a. Festival lian a nih avangin tourism department mai ni lova department dangte pawh phur taka an thawhho a tul tih a sawi.
LMF 2026 Organising Committee-ah hian sorkar department hrang hrang – home, PWD, P&ED, PHED, Health & Family Welfare, Commerce & Industries, Art & Culture leh IPRP&S te an tel a, Lunglei District Bawrhsap chu a hmuna engkim lo buaipuia ruahmanna kalpuitu tur ber a ni ang.