Aizawl: Telangana state sorkar hmalaknaa kal mi pathum awmna study team chuan Nilaini khan Health Minister Office Chamber, MINECO-ah Health Minister Lalrinpuii an kawm a, hemi hnu hian Mizoram-a Directorate of Nursing awm dan leh kalphung an zirchiang.
Telangana sorkar aiawhte hi Health & Family Welfare Department Deputy Director S. Nagarjuna, GGH-Nagar (Kurnool) Superintendent Dr. T. Usha Rani leh Secunderabad Government College of Nursing Principal Prof. R. Hansli te an ni.
Minister chuan health department aiawhin lawmthu sawina atan team member-te hi puan a bahtir.
Telangana sorkar hian an state-ah Directorate of Nursing din ve tura hmalakna an neih mek avangin Mizoram Directorate of Nursing hi zirchiang tura tirh an ni a. Mizoram-a hetiang directorate a lo awm tawh dan leh a kalphung hlawhtling tak chu entawn atan leh zirchian atan an rawn thlang a ni.
Health minister an hmuh zawh hian Telangana study team-te hian Directorate of Nursing Office, MINECO-ah kalin Joint Director Lalchhanhimi kaihhruaina hnuaiah business session an nei nghal a. He session-ah hian Directorate of Nursing din chhuah dan, organizational structure, administrative function leh din tirh atanga hmalakna hrang hrangte chipchiar takin an sawiho a ni.
He inkawmhona leh zirchianna hi ni hnih chhung kalpui tur a ni ang.