- Roluahpuia, Associate Professor (Sociology), IIT Roorkee
Mahni tawnhriatin bul ka han tan teh ang. Kum 2020, Vawkhniakzawn (July) thla khan zirtirtu han thawk turin Department of Humanities and Social Sciences, IIT Roorkee ka zawm ve a. Engineering zirna a hriat hlawh tak institute-ah, kei Sociologist kha ka lut ta daih a ni. Mi tam takin mak an ti a, vawiin thlengin IIT-ah enge ka zirtir a, enge ka tih ve tih zawhna hi ka dawng ta fo mai. Sociology subject emaw, Humanities and Social Sciences (HSS) subject emaw a awm ve em ni tih zawhna te pawh ka la dawng reng a ni.
Humanities and Social Sciences kan tih hian English, Economics, History, Sociology, Philosophy, Political Science leh Psychology te kan sawina a ni deuh ber a. IIT hrang hrang azirin eng subject nge awm tih erawh a danglam thei a; a tlangpui thu in English, Sociology leh Economics te hi chu a awm deuh fur vek a ni.
IIT-ah hian mak tak maiin HSS hian thuk takin zung a lo kaih a lo ni a. Engineering education chauh thlur bing lovin, kan independent tirha ram rethei leh skilled workforce nei tlem kan nih avang khan, kawng hrang hranga bul tan nan heng zirna inte hi din a lo ni a. IIT Kharagpur hi din hmasak ber a ni a, kum 1951 khan bul an tan a ni. Chumi hnuah IIT Bombay (1958), IIT Madras (1959), IIT Kanpur (1959) leh IIT Delhi (1961) te din an lo ni leh a. Heng institution te hian anmahni puitu (mentor) tur ram te an nei bik theuh bawk a.
Entirnan, IIT Kanpur chu US university pakua in an mentor laiin, IIT Bombay erawh chu Soviet lam, tunhma a USSR tia kan hriat lar in an mentor ve thung a, IIT Delhi chu United Kingdom (UK), leh IIT Madras chu West Germany te’n an mentor a ni. Ram hrang hrangin mentorship ang zawnga an puih avang pawh ani ang, mi thenkhatin IIT theuh theuh pawh a institutional culture a in ang lo an ti fo thin.
Heng IIT te hi engineer zirna in mai ni lo, India rama mi hlawhtling leh mithiam chherchhuahna hmun pawimawh an lo ni ta zel a. Tunlai tech company kan hriat lar Google, Microsoft, Twitter (tuan X ni ta) te thlengin, an zirtir chhuakte CEO an ni thei a ni. Engemaw chenah a din chhanah a hlawhtling viau pawh a tih theih ang. Tin, khawvel technology company lar te pawhin IIT chhuak te chu an rawn duh bik viau a; chu’ng company-ah te chuan India mi, IIT chhuak an in zarpharh nasa hle. US ah ringawt pawh khuan tam tak an awm a ni.
Vai kan tih mai, kan Indian puite hian IIT-a luh chu chu ramdanga kalna tur leilawn, an passport ah ngaiin, exam competitive tak mai Joint Entrance Examination (JEE) chu high school an nih atangte in an lo inpuahchah ta thin a. IIT-a lut chin chu mithiam leh taima satliah ni lo, an hma hun (future) pawh secure bik a an ngaih avangin a bawh in an lo bawh a ni ber. Vawiin thlengin hei hi India dinhmun ala ni ti ila kan sawi sual lutuk lo ang.
Kan zirlai thenkhatte (a tamzawk pawh anni maithei) hi mi awm thei fa an nih loh pawhin, sawrkar emaw private company emaw a hlawh tha pangai fa an ni duh viau a. A then erawh tlema chhungkaw harsa ve deuh, English thiam lutuk lo te pawh an tam thin viau. Amaerawhchu, kan zirlaite chu tumruh leh hlawhtling tura tuihalnain a khalhte an ni tlangpui; tin, tamtak chuan retheihna ata talchhuahna kawng pawimawh tak-ah an ngai bawk.
Tunah chuan IIT pawh 23 lai mai kan nei ta a. India hmarchhakah chuan IIT Guwahati, 1994-a din hi a awmchhun ala ni rih. India-a state dangte chuan anmahni state theuhah IIT an nei vek tawh ani. Heng IIT 23-ah te hian HSS department hi a awm ve vek a, a institute a zirin HSS program an offer te erawh a danglam thei. Han let lawk ila, IIT te din tirh an nih khan English (soft skills) lam thlur bing tir an ni a. Zawi zawiin dispicipline dangte tan pawh kawng inhawng chho zelin tunah chuan Social Science discipline hi a awm deuh fur ta a ni.
Kum 2009-a Yashpal Committee, sawrkar laipui din chuan IIT te-ah hian Humanities and Social Science discipline hi hei aia nasa zawkin an curriculum-ah seng lut (integrate) turin a recommend a. Hemi avang hian IIT-ah HSS ngaih pawimawhna rawn lian chho ve ta zel a, department awm sa te pawh tih changtlung zawk an lo ni ta bawk a ni.
IIT-ah te hian BA angin program nei lo mah se, vawiin ah chuan IIT tam zawkah MA program an nei tawh a. Chungte chu IIT Guwahati, IIT Gandhinagar, IIT Delhi, IIT Bombay, IIT Madras leh a dang dangte an ni. Heng MA program te hi university leh college dang ang lo deuh a zirtir an ni a; an program te hi a interdisciplinary tlangpui a. Chuvangin, interdisciplinary lam tuimi tan chuan zirna hmun tha tak an ni. Chung MA program a luh dan te pawh a institute a zirin a in ang lo bawk.
A tlangpuiin anmahniin entrance exam hran an conduct theuh a, institute dang ang thoin form fill-up a written exam leh interview paltlang ngai ve vek a ni. Tun hnaia thil thar danglam awm chu IIT-ah Economics Department, a hrana a ding ta hi a ni awm e. HSS hnuaia awm thin kha tunah chuan IIT Bombay leh IIT Kanpur-ah te chuan Department hrang angin an ding tawh a ni. Tin, IIT tam zawkin hei hi an la rawn entawn pawh a rinawm viau bawk. Heng departmentah te pawh MSc Economics a awm deuh fur bawk. IIT Roorkee ah pawh MSc. Economics leh Integrated BS-MS Economics program kan nei ve a ni.
MA zo tawh, PhD ti duh tan chuan IIT hi a tha lehzual niin a pawm theih a. Keipawh ka zir laiin IIT lam lo hawi na chang ka hrelo kha ka inchhir lek lek thin. PhD-a luh dan te pawh a institute azirin a inang lo thei a; IIT thenkhat, ka thawhna-ah te chuan kum tin admission round hi vawi 2 kan nei thin a, chu chu Autumn leh Spring angin kan then hrang a ni. Autumn a nih chuan April-ah application hawn a ni tlangpui a. Spring atan chuan October-ah application hawn a ni thung. IIT dang te nen a hun in ang lo mah se, a hun bawr vel chu a inang tlangpui a ni.
Tun hnaiah social science lam zirlai tha leh thiam tak tak ten IIT an zawm thar a, HSS lam tuimi tan chuan a tha viau a ni. Amaerawhchu, kan apply dawn a nih erawh chuan kan subject duhzawng an nei em, lo apply ila faculty ka tuina zawng leh ka research topic zirbing chak zawnga min guide thei tur an awm ang em tih te erawh hriat lawk a tha. Research kan ti dawn anih chuan kan institute apply-na kha research hmasak phawt finthlak a ni. Chutiang a nih mek laiin, mahni tuina zawng ang min guide tu tur kha an awm kher lo maithei bawk a; engemaw chenah a tul dan azirin kan tuina te pawh her danglam hreh loh a tul ve thin.
IIT-te hi a tha vek a, sawiselna tur a awm lo kan tihna lem lova. Eng eng emaw duh khawp lohna chu a awm teh meuh mai, sawiseltu pawh an tam thin. Mahse ka ti thin, India ram ang tan chuan hei bak hi chu ala awm thei chuang lo a ni. Sum kan neia, private university tha, ramchhung leh pawnah kan zir thei anih ngawt loh chuan, subsidized education tho tho hi kan innghahna ala ni rih bawk si a. A mihring azirin, tawnhriat azir te pawhin ngaihdan chu a in ang lo thei reng. Amaerawchu, IIT that bikna ka hriat ve chu: zirna a that piah lamah, tunlai tawngkam takin a ‘facility’ an lo nei tha em a ni! Sawrkar laipui fachuam an nihna hi infrastructure an neih danah a lang chiang hle. Entirnan, infiamna te, hostel te, wifi leh thil dang dangah a changtlung takzet a ni.
A hminga zirtirtu lo nih ve takah chuan Mizo zirlai tam zawk hi chu lut thei ila ka ti rilru ve nasa thin khawp mai. Kan department leh institute pumpuiah kumtin entrance result a chhuak a, beiseina nen hming tawpa ‘a’ emaw ‘i’ hi ka lo melh ru ve thin. Kan institute mai lo ni, IIT dangah pawh HSS department leh a dangah te pawh, Mizo tling an awm em tih hi undergraduate (B.Tech), postgraduate (MTech/MSc/MA) leh Ph.D., post-doc thlengin kan lo en thin a. Result kan en thla diat diat a, a khawhar thlak ru thin khawp mai. India zirna in tha, IIT mai lo ni, Indian Institute of Science (IISc), Indian Institute of Scientific Education Research (IISER), Indian Institute of Information Technology (IIIT), Tata Institute of Social Sciences (TISS), Jawaharlal Nehru University (JNU), Indian Institute of Management (IIM), National Law School University of India (NLSUI) leh a dang dangah te hian Mizo hi kan lut tam lo hle a ni.
University lamah chuan awm ve pheuh pheuh na chungin, a tlangpui thuin kan tam ngai chuang lo. Kan thawhna IIT leh hmun danga thiante atanga ka hriat tam erawh chu, a dil hi chu kan awm ve thin a, amaerawchu kan tlak thinna chu kan pass percentage (merit)-ah te pawh hian a ni duh hle. Heihi keini Mizote mai ni lo, Scheduled Tribe (ST) ah hian a nasa bik em aw a tih theih. Chuvangin, matriculation, higher secondary, BA/BSc, MA/MSc kan zirlai atangin pass percentage tha tura lo zir chhoh ngauh ngauh hi a pawimawh hle.
Mizoten zirna kan hmelhriatna hi a rei ve tawh khawp mai. Chanchin Tha-in a rawn ken tel te zinga mi, alphabet thlenga kan neih chhoh dan chhuiin, kan sakhuanna leh zirna pawh hi thuk takin a inzawm a ni kan ti lo thei lo. Mi hlawhtling tamtak kan tih te pawh hi lehkha thiam leh zir sang, vantlang pawhin a chung en an ni nghal zel bawk. A mak hran lo ve. Mi zawng zawng erawh zirna tui tura beisei a rem hran lo, beisei chi pawh ani lo. Mahse a tuimi te tan eng ang zirna nge awm a, enge beisei tur awm tih erawh hi chu kan hriat erawh a tha hle. A hnam ang zawngin bul kan tanna ngaihtuahin kan tun dinhmun hi ropui tak a ni. Mahse zirna kan hmelhriat tan dan ngaihtuahin kan thlen theih tur chin hi kan thleng em tih erawh hi chu ngaihtuah tham tak a tling tling a ni.