Jharkhand minister, Jharkhand Mukti Morcha (JMM) party hruaitu hlun tak, Sudivya Kumar-a chu Pathianni khan a thi niin an party-in a sawi a. Kum 56 mi hi heart attack vanga thi niin an hruaituin a sawi.
Giridih bialtu, Kumar-a hi higher & technical education leh urban development changtu minister a ni a. Tourism, arts & culture leh sports & youth affairs ministry a enkawl bawk.
Chief Minister Hemant Soren-a chuan Kumar-a a thlahna thu X-ah tar langin ‘Sonu Bhaiya’ tiin a ko.
“Sonu Bhaiya hi thawhpui leh politic-a kan tihpui mai a ni lo va. Ka u ang mai, ngainatawm, mi kaihruaitu leh hun harsa ka tawha ka kianga awm reng thin a ni a. A kianga ka awm leh amah atanga thil ka zir chhuahte kha ka vawng reng dawn a ni,” tiin Hindi-in a tar lang a ni.
Jharkhand chief minister chuan, “JMM sipai rinawm a ni a, a nun zawng zawng khan Jharkhand tan, a dikna leh a sanna atan a pe a. Jharkhandiyat leh a tharau hneh rual loh kha hriat reng a ni tawh ang,” a ti bawk.
JMM pawhin Kumar-a chu ‘mi danga thlak zawh rual loh’ a nih thu leh an party leh Jharkhand sorkar tan hloh lian tak a nih thu an sawi ve bawk.
Kumar-a hian fanu pahnih leh fapa a kalsan a ni.
Kumar-a hi kum 2019 khan a vawi khat nan Giridih bial atangin Jharkhand assembly member atan thlan a ni a. Chief Minister Soren-a nena inkawmngeih tak niin kum 2024-a Soren-a dan lova ram nei leh sum tichingpena puh a niha man a nih lai pawh khan a lama tang tlat a ni.
Kar hmasa khan Karnataka-ah zinin an state-in tourism-a hma an sawn theihna tur zira kalte zingah a tel a. Karnataka Tourism Minister KJ George-a nen pawh inkawmin tourism leh ramngaw humhalh kawnga thawhhona turte pawh an sawi dun a ni.