Vantlang hriata Israel thu a hnialna langsar takah US chuan Gaza atanga Palestinian mipuite sawn chhuah vek an rawtna chu a hnawlsak.
Israeli Defence Minister Israel Katz-a’n Gaza-a chengte sawn chhuah chu buaina ‘chin felna’ awmchhun nia a thlen chungchangah US State Department chuan Washington chu President Donald Trump-a’n nikuma ‘inkahhai’ a awm nana point 20 awmna ‘peace plan’ siamah a la innghat tlat tih a sawi.
“President ruahmanna Point 12-naah: ‘Tumah Gaza atangin chhuah luihtir an ni lo vang a, a chhuak duh erawh chhuakin an lo kir leh thei bawk ang. Mipuite chu awmtir zel kan tum ang a, Gaza tha zawk dinna tur kan siamsak ang’ tih a inziakah kan la ding nghet,” tiin State Department thupuangtuin Zirtawpni khan Al Jazeera a hrilh.
“US chuan tihluihnaa nawrh chhuah emaw, um chhuah emaw, chhuak ngei tura tihna ang chi engmah a duh lo,” tiin thupuangtu chuan a sawi.
Katz-a erawh chuan mihring dikna chanvo humhalhtuten hnam then fai tumna nia an sawi, Palestinian-te sawn chhuah tumna hi Trump-a hian a cancel lo va, ‘khawih lovin a la dah’ ringawt niin a sawi thung.
“A tawpah chuan Gaza chin felna tur thil dang hi a chengte sawn chhuah bak a awm dawn chuang lo,” tiin Nilaini khan a sawi.
Katz-a hian Israeli sorkar chu Gaza atanga Palestinian-te ‘tuipui, thlawhna leh thil dang hmangin’ sawn chhuak turin a inpeih a, he ngaihdan hi ‘sawiho reng a ni’ tih a sawi.
Hetih lai hian US nena thawkho tha tak tak telin Arab ram tam tak chuan Gaza atanga Palestinian-te chhuahtir chu an pawm thei lo tih an sawi ve bawk.
October 7, 2023-a Gaza-a roreltu, Hamas-ten Israel chhim lam beia mi 1,200 vel an thah leh hren tura mi 251 an hruai atanga Gaza-a indona tanah hian inkahhai puan ni tawh mah se tun thlengin ni tin deuhthaw tharum thawhna a la thleng a, muanna thlentir tuma hmalakna pawhin hma a la sawn mawh hle.
October thlaa President Trump-a rawtna anga inkahhai an pawm rualin point 20 awmna peace plan pawm a ni a. An mutan chu Gaza atanga Israel-in sipai a dahte hnuh kir vek leh Hamas-in an ralthuamte an tun a ni.
Gaza-a muanna a awm theihna tura ruahmanna enpuitu tura din, Board of Peace leh Hamas hian August thla khan ralthuam dahna tur hi an pawm tih puan a ni a; mahse, Israeli sipaite an la inhnukdawk chuang lo va, Hamas-in ralthuam an dah vek hma loh chuan sipai an hnuk kir dawn lo tih an sawi a, tun thlengin Gaza-a an awmna tur chin an siam, Yellow Line an tih chinah an la inkulh reng tho a ni.